دگرانءِ آسا پیلوشتگین فیض بلوچ و میر مری- چمشانک: ولید گربنی

لندنءَ ماں 4 دسمبر 2007 میر خیر بیار مری و واجہ فیض بلوچءِ دستگیری، پدا آوانءِ سرا 10 بھتان، ھشت ماھانءِ بندیگی و دو ماہ دراجکشیں دادگاھیءِ ذموار بے علم و جزباتی شاگرد، و غیر ذمواریں حالکاری أنت۔ أگر کموکے گيئشتر خیال گور کنگ بیتیں أت، گڈا إے واجھکاریں راجی جھدکار دگرانءِ روک کتگیں آسا إنچوک نہ ستکگ إتنت۔

بلوچ راجءِ توکا أخباری بیان دیگ و بٹاگ جنگءِ شوقا ھنچوش روتگ جتگ کہ إیشیءِ سببا ماں وتی لوگاں نشتگیں جاهل و کاهل ھم لیڈر جوڑ بیتگ أنت۔ أچ إیشاں بازیں کس کتابے وانگا نہ زانت و أگر زانت، گڈا نہ وانیت، و أگر وانیت، گڈا ھما کتابا کہ آئیءِ ندکارءِ جندا چشیں مطالعہ نہ بیتگ کہ قابلیت ئی ماں کتابءِ توکا ودی بہ بیت۔

أچ ھمے جاھلاں بازیں کس وتی تاریخا نہ زان أنت۔ أگر زان أنت، گڈا گوں پاکستان خان قلاتءِ دستا بلوچستانءِ إلحاقا و أچ آئی پیسر میر غوثبخش بزنجوءِ تران ماں قلات ریاستءِ پارلمنٹا؛ بس همنچوک زان أنت۔

ھمے خان قلاتءِ رندتری کارپداں نہ زان أنت، غوث بخش بزنجوءِ جھدءِ دربرگا واھوک نہ أنت۔ ألبت أگر کسے میر غوثیءِ باروا گيئشتر زانگ بہ لوٹیت، آئیا دربرگی ھچ چیز نہ رسیت۔ بزاں ھچ یکـّےءَ أچ حالتاکی لیڈراں إے ضرورت نہ مارتگ کہ راهدربر و جهدکارانءِ داتگیں قربانیاں نز بیاریت و کتابےءِ دروشما شنگ بہ کنت۔

ھنچوش گش أنت کہ بلوچستانءِ توکا مزنیں مزنیں سیاسی لیڈر بیتگ و لھتے أنگت ھست أنت۔ ھستيں لیڈراں بازینےءِ پاد ماں قبرء دپا أنت و مرو باندا کنگا أنت، بلے إیشانءِ شاھکارے تنے وھدی پہ بلوچ اُستمانءِ راھشونیا دستا نہ کپیت۔ إیوکا یک و دو دانـَگ بلوچ حالکار أنت کہ پہ وتی راجی ذمواریا یک دو سرحالانءِ سرا چار کتاب إش نبشتہ کتگ۔

ھنـّی بلوچ گون دو زوراک و ماڈرن فوجاں دیم پہ دیم أنت۔ إے وڑیں وھداں بلوچاں أچ ھر چیزا گيئشتر میاں اُستمانی ھمدردیءِ ضرورت إنت و ھمے ھمدردی باندا روچ بدل بیت و کمک جوڑ بیت کنت۔ پمیشا أچ حدّا گيئشتر ضروری إنت کہ بلوچ سیاسی لیڈر، جھدکار، حالکار و حالتاک میاں اُستمانی مارشتاں سرپد بہ بنت۔

دَریں راجانءِ؛ خاص مغربی راجانءِ مارشتاں زانگ و آوانءِ خیالا گوَر کنگ أچ ھر کسا گيئشتر پہ بلوچءِ جندءِ عاقبتا سک ضروری إنت۔ باید إنت کہ بلوچ إیشانءِ نیمگا پہ دوستی وتی دستاں بہ شھارت أنت و إیشانءِ دوست بیگءِ بنیادی ضرورتاں سرپد بہ بنت۔ وتی گاماں پہ گوم إیر کنگ و خبراں پہ حساب کنگ بلوچ راجءِ بانداتءِ مدامی رُژنا بلینت کنت۔

غیر ذمواری، إشتاپکاری، جزباتی بیگ و سر وت رپٹگ بلوچءِ جھدا راجانءِ دیما سبک پیشداریت و دنیا بلوچاں غیر سجیدہ لیکیت۔
باید زانگ به بیت کہ ماڈرن ملک ھما راجاں وتی رما قبول کن أنت کہ آوانءِ ھر مڈ ّیءِ بُنھشت گوں سائنسی دئورا دپ ماں دپ بہ کپیت۔ آواں سیاسی گل بہ بیت و گلانءِ پروگرام سائنسی بہ بنت۔ آوانءِ لوٹان درائیں تشریحے بہ بیت و گپانءِ سرکچ دیگا کورٹ و قاضی یے پکار مہ بیت۔

نیں کہ میر خیربیار مری و واجہ فیض بلوچ أچ دگرانءِ کتگیں بازیں ناسرپدیانءِ آماچیا رکـّتگ أنت، باید إنت کہ چدا رند سرپد تریں بلوچانءِ ٹولیے پہ إیشانءِ راہءِ ڈگر و دارانءِ دیر کنگا پیش پیش بہ بیت۔ گوں إے وڑ کنگا بُرزا نام گپتگیں سائنسی ضرورت ھم پیلو إبنت۔

Rights reserved by http://www.balochinews.com/