Friday 20 November 2009

ایران ءِ چگلی اداره یان ءِ پروش



ایران ءِ چگلی اداره یاں چه شهید عبدالواحد ءِ جانفدا هلگر ءَ هما پروش وارت کهانگت ءَ چه بلوچ سرمچارانی بیم ءَ لرزگ ءُ هبکّه انت
.آ لوٹنت هنوں پیش بدارنت که چه باز گپ ءُ هبر سهی انت. جلال سیاح نامیں چگلـے

که "معاون امنیتی استانداری " انت گوں دولتی حالرسان ایسنا ءَ گشت که: پیشن ءِهلگر ڈنی واکانی کار اَت.

اے گستاه ءُ بلوچ دژمنیں رستر آدگه جاهلیں حکومتی واکدارانیپیما په مردمانی ریپینگ ءَ بازیں دروگ بست ءُ گشت که شهید عبدالواحد گوں تبلیغ جماعتی یان
هور بوتگ ءُ ماں سرحد (پشتونستان) ءَ سلهبندی جنگ بلد کنگ بوتگءُ ....


رستریں جلال سیاحءُ ایران ءِ آدگه چگل ءُ اطلاعاتی هچبر نزاننت که زهرکنیں بلوچ سرمچار ءِ تیرکدین ءُ کجاءُ چوں آهاں لگنت.

بلئے ایشی ءَ زانگ انت که بلوچستانءِ هچ جاگهے په آهاں امن نهنت .

واجه عبداالمالک ريگیءِ شش (۶) شرط



واجه عبداالمالک ريگی جندالله ءِ سروک ماں بيانے ءَ جار جت که په شش (۶) شرط ءَ تيارانت که سلهبندين جد ءُ جهد ءَ ماں بلوچستان ءَ باوشتارينيت. ورنائيں ريگی ءِ شرط ايش انت:
۱ـ بلوچ کوم ءِ لٹ کٹ ءُ کشتار بند به بيت
.۲ـ بلوچ سياسی بنديگان ءُ تمامين سنی بنديگاں آزات به بنت
.۳ـ بلوچ بنديگانی پاهو ءُ چيروکايی کشتار ماں بنديجاهاں اوشتارينگ به بيت
.۴ـ بلوچ کوم ءِ دود ءُ ربيدگ (فرهنگ) ءُ نيکراه (مذهب)ءَ بے احترامی مه بيت
.۵ـ سپاه پاسداران گوں تماميں بنجاهاں چه بلوچستان ءَ درکنگ به بنت
.۶ـ بلوچ سياسی هوربند ءُ اجتماعی چست ءُ اير آزات به بنت
.جندالله ءِ سروک ءُ گوشتگ که اگاں ايران ءِ حکومت اے ششيں شرطان پوره بکنت گڑا جندالله ءِ سرمچاران وتی سلاهان ائير کننت

Monday 16 November 2009

میر بالاچ مریءِ شھمیریءِ دئومی سالروچ دارگ بیگا إن


بلوچ شھمیرانءِ سالار میر بالاچ مریءِ شھمیریءِ دئومی سالروچ دنیاءِ أواریں کنڈاں دارگ بیگا إنت۔ خاصیں دیوانے ماں مشرقی بلوچستانءِ بنجاھی شھر کوئٹہءِ دمگ نیوکاھانءَ 19 نوامبرءَ برجم دارگ إبیت۔

إیشیا أبید مزنیں دیوانے مان أمریکاءِ شھر واشنگٹن ڈی سیءِ نشنل پرئس کلب شہ بلوچستانءِ أمریکائی دوست نامیں گلےءِ نیمگا سرجم کنگ بیگا إنت۔ إے دیوانا واجہ أحمر مستی خان سرکشی کنگا إنت و بھر زیروکیں مھمانانءِ نیاما سیاسی و چاگردی شھزانت گون أنت۔

واشنگٹنءِ دیوان 21 نوامبرءَ صحبءِ کلاک 10 تا بیگاہ 6ءَ دارگ بیگا إنت۔ خاصیں ترانکار واجہ سلئگ ھئریسن، إسماعیل أمیری، پروفسر گل آغا، داکٹر ظفر بلوچ دگہ لھتے گچینی کوّاس أنت۔

گڈی خاصیں دیوان ماں لندن یونیورسٹی یونینءِ ماڑیا شہ سئے ٹولیانءِ نیمگا ھؤریا برجم دارگ بیگا إنت۔ برجم داروکیں ٹولیانءِ نام 'بلوچ یومن رائٹس کونسل، بلوچستان رائٹس موومنٹ و ورلڈ سندھی کانگرس' أنت۔

لندنءِ دیوان 22 نوامبرءِ بیگاہ کلاک 1 تانکہ 4ءَ بیگی إنت۔ گوں إے دیوانا سریں جھدکار تران کن أنت۔ خاص واجہ صمد بلوچ، واجہ فیض بلوچ و واجہ حلیم بھٹیءِ نام ودی أنت۔

شھمیر بالاچ مری گون پاکستانی فوجا یک دیم پہ دیمی جنگےءِ درگتا مشرقی بلوچستانءَ 21 نوامبر 2007ءَ جنگ بیتگ أت۔ میر بالاچ مریءِ گوں پاکستانی فوج مڑگءِ مقصد بلوچستانءِ آزادی أت۔

Saturday 14 November 2009

دگرانءِ آسا پیلوشتگین فیض بلوچ و میر مری- چمشانک: ولید گربنی


لندنءَ ماں 4 دسمبر 2007 میر خیر بیار مری و واجہ فیض بلوچءِ دستگیری، پدا آوانءِ سرا 10 بھتان، ھشت ماھانءِ بندیگی و دو ماہ دراجکشیں دادگاھیءِ ذموار بے علم و جزباتی شاگرد، و غیر ذمواریں حالکاری أنت۔ أگر کموکے گيئشتر خیال گور کنگ بیتیں أت، گڈا إے واجھکاریں راجی جھدکار دگرانءِ روک کتگیں آسا إنچوک نہ ستکگ إتنت۔


بلوچ راجءِ توکا أخباری بیان دیگ و بٹاگ جنگءِ شوقا ھنچوش روتگ جتگ کہ إیشیءِ سببا ماں وتی لوگاں نشتگیں جاهل و کاهل ھم لیڈر جوڑ بیتگ أنت۔ أچ إیشاں بازیں کس کتابے وانگا نہ زانت و أگر زانت، گڈا نہ وانیت، و أگر وانیت، گڈا ھما کتابا کہ آئیءِ ندکارءِ جندا چشیں مطالعہ نہ بیتگ کہ قابلیت ئی ماں کتابءِ توکا ودی بہ بیت۔


أچ ھمے جاھلاں بازیں کس وتی تاریخا نہ زان أنت۔ أگر زان أنت، گڈا گوں پاکستان خان قلاتءِ دستا بلوچستانءِ إلحاقا و أچ آئی پیسر میر غوثبخش بزنجوءِ تران ماں قلات ریاستءِ پارلمنٹا؛ بس همنچوک زان أنت۔


ھمے خان قلاتءِ رندتری کارپداں نہ زان أنت، غوث بخش بزنجوءِ جھدءِ دربرگا واھوک نہ أنت۔ ألبت أگر کسے میر غوثیءِ باروا گيئشتر زانگ بہ لوٹیت، آئیا دربرگی ھچ چیز نہ رسیت۔ بزاں ھچ یکـّےءَ أچ حالتاکی لیڈراں إے ضرورت نہ مارتگ کہ راهدربر و جهدکارانءِ داتگیں قربانیاں نز بیاریت و کتابےءِ دروشما شنگ بہ کنت۔


ھنچوش گش أنت کہ بلوچستانءِ توکا مزنیں مزنیں سیاسی لیڈر بیتگ و لھتے أنگت ھست أنت۔ ھستيں لیڈراں بازینےءِ پاد ماں قبرء دپا أنت و مرو باندا کنگا أنت، بلے إیشانءِ شاھکارے تنے وھدی پہ بلوچ اُستمانءِ راھشونیا دستا نہ کپیت۔ إیوکا یک و دو دانـَگ بلوچ حالکار أنت کہ پہ وتی راجی ذمواریا یک دو سرحالانءِ سرا چار کتاب إش نبشتہ کتگ۔


ھنـّی بلوچ گون دو زوراک و ماڈرن فوجاں دیم پہ دیم أنت۔ إے وڑیں وھداں بلوچاں أچ ھر چیزا گيئشتر میاں اُستمانی ھمدردیءِ ضرورت إنت و ھمے ھمدردی باندا روچ بدل بیت و کمک جوڑ بیت کنت۔ پمیشا أچ حدّا گيئشتر ضروری إنت کہ بلوچ سیاسی لیڈر، جھدکار، حالکار و حالتاک میاں اُستمانی مارشتاں سرپد بہ بنت۔


دَریں راجانءِ؛ خاص مغربی راجانءِ مارشتاں زانگ و آوانءِ خیالا گوَر کنگ أچ ھر کسا گيئشتر پہ بلوچءِ جندءِ عاقبتا سک ضروری إنت۔ باید إنت کہ بلوچ إیشانءِ نیمگا پہ دوستی وتی دستاں بہ شھارت أنت و إیشانءِ دوست بیگءِ بنیادی ضرورتاں سرپد بہ بنت۔ وتی گاماں پہ گوم إیر کنگ و خبراں پہ حساب کنگ بلوچ راجءِ بانداتءِ مدامی رُژنا بلینت کنت۔


غیر ذمواری، إشتاپکاری، جزباتی بیگ و سر وت رپٹگ بلوچءِ جھدا راجانءِ دیما سبک پیشداریت و دنیا بلوچاں غیر سجیدہ لیکیت۔
باید زانگ به بیت کہ ماڈرن ملک ھما راجاں وتی رما قبول کن أنت کہ آوانءِ ھر مڈ ّیءِ بُنھشت گوں سائنسی دئورا دپ ماں دپ بہ کپیت۔ آواں سیاسی گل بہ بیت و گلانءِ پروگرام سائنسی بہ بنت۔ آوانءِ لوٹان درائیں تشریحے بہ بیت و گپانءِ سرکچ دیگا کورٹ و قاضی یے پکار مہ بیت۔


نیں کہ میر خیربیار مری و واجہ فیض بلوچ أچ دگرانءِ کتگیں بازیں ناسرپدیانءِ آماچیا رکـّتگ أنت، باید إنت کہ چدا رند سرپد تریں بلوچانءِ ٹولیے پہ إیشانءِ راہءِ ڈگر و دارانءِ دیر کنگا پیش پیش بہ بیت۔ گوں إے وڑ کنگا بُرزا نام گپتگیں سائنسی ضرورت ھم پیلو إبنت۔


Rights reserved by http://www.balochinews.com/

اَدھے تو اَدھے من، نہ؛ کپّے تو کپّے من! وش گپی: ولید گربنی

بلوچی نیوز وتی زیگین تبصرہءِ تؤکا وتی زبانءِ نیمگا بلوچانءِ نادلگؤشیءِ سرا دل پدردی درشان کتگ اَت۔ اؤدا یک نقطوے کہ دیگ بیتگ اَت، آ بلوچانءِ دؤستی گؤن اردو و فارسیءَ اَت و گشگ بیتگ اَت کہ چہ آ زبانانءِ گپ کنؤکان بلوچ گامے پہ آوانءِ دیئما برگا دیئماتر اَنت۔ پدا ھمے گپءِ ھمدرورین جُستے نامدارین بلوچ جھدکار واجہ احمر مستی خان گتگ اَت۔ آئی اردو بتل "شاہ سے زیادہ شاہ کا وفادار"ءِ ھمدرورین بلوچی بتلے شؤھازیگ اَت۔
یے وھدی منا ھچ چشین بلوچی بتل یاد نہ آیگا اِنت، بلے بیت کنت کہ ھمشیءِ جند بلوچی یے بہ بیت۔ چیا کہ بلوچی چہ اردو کوئھن تر اِنت و اردو پنڈؤکین (بھکاری) زبانے اِنت. شاید یے بتل چہ بلوچیءَ دوزگ و آوار جنگ بیتگ۔ اشیءِ بلوچی درؤشمءِ برجاه آرگا بس "سے" گالءِ بدلا بلوچی "چہ" دیگ بہ بیت و "کا"ءِ بدلا بلوچی "ءِ"، گڈا جؤڑ بیت "شاہءَ چه زیادہ شاہءِ وفادار"۔ البت اگر اؤپار مہ رؤت و گالانءِ ردء بندءِ سرا مردم راضی مہ بیت گڈا بس"چہ" گال چہ " شاہءَ" پیئسر برگ به بیت۔ سک سادہ اِنت؛ یا نہ؟
‏ھمے چست ئیرانءِ تؤکا منا چیزے رؤچان پیئسریگین یک حبرے یاد آتک۔ اؤدا من یک دراجکشین سیاھگے نبیستگ اَت۔ گڈا مئے سنگتےءَ چہ سرجمین نبشتانکءِ نقطہ و سرحالا یک گالے گچین کت و ھمشی ما دوئیان چست ئیر کت۔ پدا من دیست کہ ما جاھے رسگا نہ اِنت، گڈا من شکست منّ اِت و وتارا چہ واجہءِ ڈؤبارگان رکّینت۔
نین بازین کس زانگ لؤٹ اَنت کہ یے گال کجا یک اَت! بہ گشان کہ اِشی انگریزیhuman گال اَت۔
من بلوچی آبان اِشی "یومن" نبیستگ اَت و مئے واجھ گشگا اَت کہ اشی "ھیومن" بہ بیت۔ من دلیل دات کہ یے گالءِ تؤکا انگریز "ھ"ءِ توارا نہ کشّ اَنت۔ مئے دؤستا انگریزانءِ نیاما وتی 30 سالءِ زندگیءِ دلیل دات و گشت کہ یے سالان آئی ھچبر نہ اشتکتگ کہ انگریز "ھیومن"ءَ "یومن" بہ گش اَنت۔ وتی دلیلءِ منّینگا واجہءَ منا ڈکشنرییے لنکے ھم دات۔ من چارت و دیستان واجہ راست گشگا ات۔
نین گپ ادا یے نہ اِنت کہ من پہ وتی دلیلءِ منّینگا گيئشتر زؤر پرچا نہ جت و چہ مشرقی لندن لھتے "کوکنی" گپ جنوکانءِ حبر ضبط نہ کت، و پہ واجہءَ دیئم نہ دات اَنت؛ گپ اش اِنت کہ آخر بلوچےءَ پرچا انچو نقطہ و گپ ڈالچار کت اَنت و یک درین گالےءِ توارءِ سرا په بحث کنگا دست ئیر کت؟
البت یوکا ما نہ انت کہ گالان چست ئیر کن انت۔ دگہ ھم بازین ھست انت چؤکہ مدتے پیئسر امریکائی صدر مزنین بش و یک دگرےءِ نیاما زمینی سیب "potato"ءِ گالوارءِ سرا بحثے یاد آتک۔ یکّےءَ گشت "پوٹاٹو" اِنت و دگرےءَ گشت "پوٹئٹو" اِنت۔ مئے و دگرانءِ نیاما بس فرق اش اِنت کہ دگہ وتی گالان لیئس پلّیئس کن اَنت و ما دگرانیان!

مارا چارگ لؤٹیت کہ ما بلوچ وت زبانء دیئما برگا چے کنگا انت؟ ولید گربنی



بازین مدتےءَ رند زرمبشءِ بلوچی نبشتانکے گندگ بیت۔ واناک اَت، بلوچی ءَ ات؛ چم سارت بیت اَنت۔ بلے آئیءِ تؤکا داتگین حبر ھما کوئھنین گلہ و زاری، و سرکارانءِ ڈؤبارگ!


راستے! تناوھدی سیاسی زؤر ھست، آ دگہ تکان ھم چه سرکارانءِ نیئمگا کار بیت نہ کنت. انچؤک سالانءِ زؤراکی شؤن دے اَنت کہ سرکاران وتی پاد میخ کتگ اَنت ونزیکین آیندوا ظلم زؤر وتی جاگوا پشت کپ اَنت۔ خاص لبزانکءِ پڑا چہ سرکارانءِ نیئمگا کسانترین ریایتے رسگءِ امید نیست اِنت۔


پاکستان و ایرانءِ سرکارانءِ دستا بلوچی زبانءِ ڈالچاری وتی جاگوا وا برجاہ اَنت؛ چارگ پہ کاراِنت کہ ما بلوچ وت پہ وتی زبانءِ زندگ دارگ و دیئما برگا چے کنگا اِنت؟


گندگ ھنچؤ بیگا انت کہ مروچی بلوچ ندکار، خاص سیاسی گلانءِ رندگری کنؤک فارسی و اردو زبانانءِ خدمتا چہ آ زبانانءِ جندءِ گپ کنؤکان انگت دیئما تر اَنت۔ ھنّی کہ انٹر نٹءِ سھولت ھست اِنت و ھچ مال و زرّے پہ شنگ کنگا نہ گر اَنت، پدا ھم بلوچی نبیسؤکان ما نہ گندگا اِنت۔ ھر مرد ویبسائٹےءِ واھوند اِنت، کسے ھست بہ گشیت کہ چنچوک چہ اشان بلوچی زبانءَ دیئما برگا اَنت؟ سیاسی گل کہ راجی مارشتان زندگ دارؤک و ردوم دیوک اَنت؛ چنچوک چہ اشان بلوچی نبشتانک شنگ کنت؟


چہ وت بلوچیءَ چیزے نبیسگ و شنگ کنگ وتی جاھا، دگرانءِ نبشتانکان شؤھاز کنگا بل؛ چؤ منینے کہ چیزے نبیسیت و شنگ کنت، اشیا وتی وبتاکان پہ وتی وبتاکانءِ وانؤکان لِنک دیگءِ بدلا وتی ھردچاریءِ پؤستا گورا دے اَنت و ڈالچار کن اَنت۔ چہ اشان جست کنگ بہ بیت کہ آخر شما چونکا بلوچی زبانءَ رُشت دات کن اِنت؟


اگر گؤن سرمبچاری؛ گڈا بہ چارت کہ تاریخ شاھدی دنت کہ تنگ نظرین مردم دیئما نہ شتگ اَنت و نے ھچبر رؤ اَنت۔ بے بلاہء بلوچستان و بلوچ راج؛ ھردچارین و وتگڑین زانوگر کہ چہ یکا دگرءِ زھرا مان دلان کولکوچ اَنت، وت وا گار و گمسار بنت ھؤریا راجءَ تباہ و سرڈگارا هم باھین اَنت۔


یے پھکین گپان کنگا رند چہ سیاسی و چاگردی جھدکاران یے دسبندی کنگ ضروری اِنت کہ پہ وتی لبزانکءِ دیئمروی کار بہ کن اَنت۔ خاص چہ راجی زرمبش مردم ھمے واھگ کن اَنت کہ کما چہ کمتر ھمے 'بلوچستان ٹی وی'ءَ وانتگین حالانءِ سیاھگان شنگ بہ

کن اَنت۔ اشانءِ سرا بلوچ وانوکانءِ چم کپ اَنت، ھمشی وت یک بلاھین ثمرے دنت۔ ۔


بلوچی سبز و بلوچستان آزاد و آباد بات۔


Wednesday 4 November 2009

عیدوخان ریکی ءُ عبدا لمالک ریکی


بلوچستان ءِ ھما بھر کہ مروچی ایرانی مردکان ءُ جنینکانی لگتانی چیرا انت پیش چہ ٨١ سال ءَ وتسر ءُ آزاتیں ملکے بوتگ ءُ ھر دمگے ءَ یکّے ءَ بادشاھی کتگ .رند چہ جنگ جھانی اول ءُ دوم ءَ عُسمانی امپراتوری ءِ پروش ورگ ءُ کمونیست ءِ سِرّ ءُدور ءُ نپت ءِ درگیجگ ءَ دنیاءِ آ دور ءِ زورمنداں چو کہ انگریز ءُ آ دگراں نوکیں کِشک کشان کت ءُ پہ وتی نپ ءُ سوت ءَ نوکیں ملک جوڈینت ءُ بلوچستان گوں آیران ءُ رندا پاکستان ءُ اوگانستان ءَ بھربھر کت . وھدیکہ انگریز ءَ ایران جوڈینت رضا پالامی کہ ھما میر پنچ ببیت ایران ءِ بادشاہ کت ءُ وھدیکہ آئی ءَ گوں انگریز ءَتِرِّ پہ کُسی کت ءُ ھیتلر ءِ رند ءَ کپت آئی گپت ءُ جزیرہ موریس ءُ رند ءَ اپریکہ ءَ دور دات کہ ھموداں مرت


سال ١٣٠٧ ھجری شمسی ءَ بلوچستان گوں ھپت ماہ جنگ ءُ چوپ ءُ گُڈ سر ءَ پہ قرآن ءِ رپک ءُ مندر ءَ کہ پہ دوست محمد خان ءَ دیم دیگ بوت ءُ آ بامرد ءَ رد وارت رضا پالامی ءِ دست ءَ دیگ بوت .پہ دوست محمد خان ءِ ھکومت ءِ پروش دیگ ءَ عیدو خان ءَ مزنیں نکشے ءَ لیب ءُ گوازی کتگ . جھانبانی کہ رضا پالامی ءِ پوجی کمانڈر ات آ نبیسیت اگاں عیدوخان ءِ کمک ءُ مدت مبوتیں ما ھجبر مکّران ءِ گرگ ءَ کامیاب نبوتیں . البت عیدو خان ریکی پیش ءَ گوں انگریزاں ھور بوتگ ءُ ھمایاں رضا پالامی سرسوج کت کہ آ بامرد ءَ گوں وت بزورانت . ءُ ھُچش ھم بوت . جھانبانی ءَ وتی جنک گوں عیدوخانءِ بچک ھوشنگ ءَ سانگ دات . بزاں بھادُّریں بلوچ ءِ بچ پہ پارسی ..... ءَ.بھا بوت. ایش ات بلوچستان ءِ سَّٹ ءُ سوداءُ داد گیر


رضا پالامی ءُ آئی ءِ گریواسکیں بچ محمد رضا ءِ وھد ءُ باریگ ءَ بلوچ گلامی ءِ زمزیلاں بندگ بوت انت . آیاں وتی لانک پہ بلوچی زبان , راجدپتر ءُ دود ءُ ربیدگانی گار دیگ ءَ بست انت ءُ لھتے دپ چَٹّ ءُ چمکُٹیں بلوچ وتی گلام کت انت کہ اے کار ءَ شرتر دیم ءَ بہ بر انت . آ گلامانی چکّ ءُ نماسگ دنیگا پارسیانی رند ءَ کپتگ انت ءُ گلامی ءِ زمزیلاں لونجان انت.پھلوی پادشاھی ھلاس بوت ءُ کوریں خمینی ءِ دور بنگیج بوت ءُ بلوچ ءِکشت ءُ کوش گیش بوت


البت گوشگ لوٹیت اے ٨١ سال ءُ مدّت ءَ بلوچ مدام گوں گجراں جنگ بوتگ انت ءُ ھچبر بلوچستان امن ءُ امان نبوتگءُ دانکہ انگت ءَ ھنچش انت . نرمزاریں بلوچاں پارسی جتگ ءُ کشتگ انت .ءُ پارسیاں وتی پیشی گلامچُّک پہ آیانی جنگ ءُ گاردیگ ءَ دیم ءَ کتگ انت . دور آتک ءُ پہ عبد آلمالک ریکی ءَ سر بوتگ کہ پہ مردانگی یک دستیں خامنہ ای ءِ پاسداراں کشگ ءُ ریچگ ءَ انت . یکشمبے ١٨ اکتوبر ٢٠٠٩ ءَ عبد الواحد سراوانی ءَ وتءَ بمبے بست ءُ پیشن ءِ دمگ ءَ پاسدارانی بازیں رمبے بزاں گیش چہ یکسد کشت ءُ بازینے ٹپّی ءُ زدگ کت انت .پیش چہ اے کشت ءُ کوش ءَ آئی ءِ پیشی جنگ چوپ شاھیاں پہ وت زرت انت کہ مئے سرمچار انت کہ اے کاراں کنگ ءَ انت . بلے رند چہ پیشن ءِ پاسدارانی کشگ ءَ گریواسکیں محمد رضا ءِ بچ بے تاجیں رضاشاہ دوم ءَ جار جت کہ عبدالمالک ءَ شریں کارے نکتگ کہ پاسدار مئے برات ءُ آزیز انت


ھما شاھیاں کہ عبدالمالک ریکی گوں لھتے بلوچیں گلاماں آزمان ءَ رسینتگ ءُ سرکتگ ات مروچی گوں وتی درانڈیھیں مرشد ءَ دپ یکےّ کتگ کہ ھو ریکی ءِ اے کار ناھودگیں کاریں ءُ ما آئی ءَ ایرجنیں. جنگ ءُ چوپ بلوچانی جنجالاں گیش کنت .پہ تیر ءُ تپنگ ءَ ھچ کار شرّ نبیت . اے بزگّیں گلاماں شمشتگ ھمے تیر ءُ تپنگ ات کہ صدام ھاکاں دور دات , ءُ تالبانی ھکومت چپّی بوت . رضا پالامی ءِ تیر تپنگاں بلوچستان ءِ آزاتی ھلاس کت . بلے ھنوں کہ بلوچاں سلاہ چست کتگ ءُ پاکستان ءُ ایران ءِ ھلاپ ءَ پہ بلوچستان ءِ آزاتی ءَ جنگ ءَ انت گوں ھامگیں دپاں پارسی رادیو ءُ تی وی اں پوتاری کن انت کہ بلوچ امن پرست انت .ءُ ریکی رد انت .پارسیانی گلامُکاں شمشتگ کہ تیرءُ تپنگاں یوگسلاوی ٹُکّرٹُکرّ کت . تیرءُ تپنگ ات کہ اریترہ آزات کنگ بوت . ایرانی ءُ آوانی بلوچیں گلامُک شرّ زاننت اگاں بلوچ کرد ترک عرب ءُ ترکمن ءُ لُر تپنگ دست ءَ بگر انت ایران پشت نکپیت ءُ ھما ٨١ سال پیش ءِ پارس ھم نہ مانیت . گلامُک چہ بہ منّ انت چہ ممنّ انت ایران ءِ مرک نزیک انت
ایرانی ملا کہ سی سال انت کہ بادشاھی کنگ ءَ انت اگاں آ ناچار ببنت کہ پدا مسیتاں بروانت ءُ بانگ ءُ سلات بکن انت جنگ ءَ وت مچیّننت ءُ ایران ءِ پرشت پروشءِ راہ ءَ وت ساپ کن انت ءُ آئی ءِ نشانی پیداورانت.


چہ عبدالمالک ریکی ءَ دزبندی انت کہ اگاں پیش ءَ پہ دید ھلکاں گوں ایرانیاں چوپل گوازی کتگ چہ آوانی رند ءَ بہ ترّیت ءُ بلوچی ءِ راستیں کشک ءَ بیئت کہ سوت ماں شکلّیں جنگاں انت . چہ پارسیانی بلوچیں گلامُکانی رند ءَ پچ بترّیت . آ گوں وتی سرمچاراں گوں رودراتکی بلوچستان ءِ سرمچاراں ھور ببیت ءُ پہ مزنین بلوچستان ءِ آزاتی ءَ دیم ءَ روان ببیت. پہ بلوچستان ءِ آزاتی ءَ بلوچاں دوزواہ ھست اںت .آ کس کہ نچاری کار ءَ ھمتنگ نہ لڈیّت بار ءَ جزماں کہ کپیت ماں گارءَ


پرشت پروش بات انت ایران ءُ پاکستان

آزات بات مزنین بلوچستان
علی رئیسی


Tuesday 3 November 2009

مشرقی بلوچستان؛ ٹرافک کزایےءَ 7 فٹبال لئیبی کشگ بوت أنت


ماں خضدار بیوکیں لئیبےءَ سرجم کنگا رند دیم پہ قلات روگءِ درگتا قلات فٹبال ٹیمءِ لئیبیانءِ گاڑی ٹرافک کزایےءِ آماچ بیت۔ إیشیءِ سببا 7 لئیبی و یک دگہ کسے کشگ بوت أنت۔ إیشانءِ کشا 12 کس ٹپـّی أنت۔

روچتاک إنتخابءَ شنگ بیتگیں حالا داتگ کہ سورابءِ نزیکا فٹبال ٹیمءِ گاڑیا گوں دگءِ کشا اوشتاتگیں یک خرابیں گاڑییےءَ ڈیک وارتگ۔ کشگ بیتگيں مردمانءِ نیاما قلاتءِ نامداریں حالکار محمود آفریدیءِ براتزھگے ھم ھؤر إنت۔

إے کزاءَ کشگ بیتگیں مردمانءِ نام عطاءُ اللہ چکءِ سوات خان، ساجد حسین چکءِ محمد حسین، سلیمان چکءِ ماسٹر مجیب، ماسٹر محمد کریم چکءِ رحیم بخش، علی أحمد چکءِ عبدالصمد، محی الدین چک قاضی عبدالستار و پولیسءِ کمکاریں إنسپکٹر سیف اللہ شنگ کنگ بیتگ أنت۔

مشرقی بلوچستانءِ وزیر سردار إسلم بزنجو و سر وزیر أسلم رئیسانیءَ کشگ بیتگیں مردمانءِ کٹمانءِ دیما وتی دلپدردی درشان کتگ أنت۔ آواں شہ نادراھجاہءِ کارمنداں لوٹ کتگ کہ ٹــپّیانءِ چارگ وارگا نزوری مہ کن أنت۔

Monday 2 November 2009

بــلــوچ ءَ سـَـلام


بــلــوچ ءَ سـَـلام


لـَـک شـَهید ، لـَـک بیل و لـَـکیں ماه و روچ

کــَنــت سـَـلام دُردانـَـگــیــں پـَر تـو بـَلــوچ

مــاه و اِسـتــاراں و پـَـؤر ، داں روشن انت

نِــیــر ءَ زیر انت هـَـاک ءَ تـئـیـگ ءَ و گــروچ



پــَـهـــر په سَـر بــُـرزاں و پـُر زانــتــاں بیت

روژنــا ژیــمــبــیــں شـَپ هـم مهکان بیت

داد تــرا راجــدپــتـــر و راجـــاں چــه گــوں

هـَـاک تــرا مهر انت و مِـسـک ءِ جـان بیت



زنــدمـان جــهــدانی لـَـکی یـیـں بـَـر انت

پـَـهــر اُمـیـت انت و زِهـاں و اِســپَــر انت

زانـت شـَپــانی شَپ چـراگ و انـگـَر انت

زانت تئی دوزواه و پـُشت انت و سَر انت



تـاج تـرا نـام انـت نـیـکـیــں ، هـَـاک و آپ

اِسپـَـر ات مردی گوں داته ، زهم ءَ چاپ

بـــیـــرک اِت روچ روژنــایــیــں نــیــل تـاپ

مـَردی اِت کــوه انــت بـُرزیں ، کـوه کاپ



دَپـتـر ات جـُهـد انـت و راهــانی دَر انت

راه تئی مردی ، تـئـی زانت ءِ شـَر انت

چَـمّ تـئـی بـانـزانی دیـر گِندیں چـَر انت

هم سپاه اِت بــے بـهـا ، بــے دَروَر انت


داں زمانگ هست ، سَربُرز بات ئـے تو

روژنـــا ، آبــات ، آزات ، شــات ئـــے تو

مـهـلـب . کـنگر ، دوئـیـں یکزات ئـے تو

په نزانتکاریں بداں ، شـَهـمـات ئــے تو


او بـلوچ ! پَهر په جهان بات ئـے مـُـدام

زندگاں دراهیں جهان کنت انت سَـلام

رَه گِـر و رَه پـول ، مـنـزل جـَنـت شــام

دیر نه انت ٹِک دَنت پتو هم سوبءِ بام


لـَـک شـَهید ، لـَـک بیل و لـَـکیں ماه و روچ

کــَنــت سـَـلام دُردانـَـگــیــں پـَر تـو بـَلــوچ


کریم بلوچ _ تـَهـل

شَلـْـگـُـم


چـُـکانی دیوان اُرُس ءِ گیدی آزمانک


ترینـــــــوک : کریم بلوچ _ تـَهـل


شَلـْـگـُـم


پیـرُک ڈگار ءَ شَلگُمے کِشت . شَلگُم رُست و مَزَن بیت

پیرک لوٹـِت که شَلگم ءَ چه ڈگار ءَ به گـُـوَج ایت ؛ کـَشّ اِت و هرچی زور ئی جَت و کـَشّـِت ئی ، گـُـوَتک ئی نه کـُت

پیرک تَوار کت بـَـلـّـُک ءَ که آئیا مَـدَت بکنت .


بلّـُک گِپت پیرُک ءَ ، پیرُک گِپت شَلگُم ءَ ؛ هرچی زور اش جَت و کـَشّت اش ، گوتک اش نه کت .


بَلـّک توار کت وتی نواسگ ءَ که آهان ءَ مَـدَت بکنت . نواسگ گـپـت بلک ءَ ، بـلّــُـک گِـپـت پـیـرُک ءَ ، پیرُک گِپت شَلگُم ءَ ؛ هرچی زور اش جَت و کـَشّت اش ، گوتک اش نه کت .


نواسگ توار کت وتی کـُچَکـُک « ژوچُک » ءَ که آهان ءَ مَـدَت بکنت . ژوچـُـک گِـپـت نواسگ ءَ ، نواسگ گپت بلک ءَ ، بـَـلـّـُک گِـپـت پـیـرُک ءَ ، پیرُک گِپت شَلگُم ءَ ؛ هرچی زور اش جَت و کـَشّت اش ، گوتک اش نه کت .


کـُچَکـُک « ژوچُک » توار کت پــِشـُک ءَ که آهان ءَ مَـدَت بکنت . پشّـُک « ماشکا » گِپت کـُچَکـُک « ژوچُک » ءَ . ژوچـُـک گِـپـت نواسگ ءَ ، نواسگ گپت بلک ءَ ، بـَـلـّـُک گِـپـت پـیـرُک ءَ ،پیرُک گِپت شَلگُم ءَ ؛ هرچی زور اش جَت و کـَشّت اش ، گوتک اش نه کت .


« ماشکا » یین پشّــُک توار کت مـُشـْکـُک ءَ که آهان ءَ مَـدَت بکنت . مُشْکـَلـُک گِپت « ماشکا » یین پشّــُک ءَ « ماشکا » گِپت کـُچَکـُک « ژوچُک » ءَ . ژوچـُـک گِـپـت نواسگ ءَ ، نواسگ گپت بلک ءَ ، بـَـلـّـُک گِـپـت پـیـرُک ءَ ،پیرُک گِپت شَلگُم ءَ ؛ زور اش جَت و کـَشّت اش ، آهر ءَ گـُـوَتـْک اش شَلـْـگـُم ءَ و هوری ءَ گِـرَست و وارت اِش
!

مشرقی بلوچستانءَ إیرانی واکانءِ یک دگہ دستمانجییے

پاکستانءِ اردو زبان حالتاک نوائے وقتءَ شنگ بیتگیں نوکتریں حالےءِ ردا جیوانیءِ نزیکا ماں مکران زرءَ إیرانی واکاں یک پاکستانی کشتییے داشت و آئیءِ 9 کارمند دستگیر کت أنت۔ إے پاکستانی واکدار وتی کشتیا سوار و غیر قانونی ماھیگریءِ دیما دارگا گــَشتا بیتگ أنت کہ ردیا إیرانیانءِ نیمگا سر إش کپتگ۔

Sunday 1 November 2009

جندا۔۔۔ءِ جھدءِ سیت یا نقصان پہ کیا؟ چمشانک: ولید گربنی


16 مارچ 2006ءَ إیرانءِ بازیں فوجیاں ماں تاسوکی کشگا رند وھدے کہ أولسرا جندا...ءِ نام دیما آتک، گڈا وابیں سرکار مخالف إیرانی ٹولیاں گلے چت۔ پھک شوھازیگ بیت أنت کہ ھمے نیکاں در بہ گیج أنت۔ إے پڑا 'سلطنت طلب' شہ پھکاں پیسر جندا...ءِ درگیجگا سوبین بیت أنت۔ رسگا جندا...ءِ سروک عبدالمالک ریگی أش گوَرنباز کت۔ وتی حالجاہ و ٹلوژن چئنلاں توار إش کت و گوں آئی دراجکشیں گالگدار إش کت۔ ھمے درگتا بازیں بلوچ راجپھازاں أنگت زانت نہ کتگ أت کہ ریگی کئے إنت و شہ کجا دراتکگ۔

پدا هم، بلوچ یا غیر بلوچ پھک راضی بیت أنت کہ ماں بلوچستان إنچو سرکاری واکدار یکپارگی کشگ بیتگ أنت۔ شاھیاں عبدالمالک ریگی دل أڈی دات تانکہ دیمترا ھمے وڑا آوانءِ دشمناں یک یکـّا بہ کوش أنت۔ پمیشا أنگت سالے پر نہ گوستگ أت کہ 14 فروری 2007ءَ جندا...ءَ یک دگہ پُرسوبیں بیڑےءَ 18 پاسدار ماں زاھدان کشت أنت۔


زانگ ضروری إنت کہ شہ پیسری بیڑا دانکہ إیشی إیرانی واکاں ھم وتی دست پُشتا نہ بسته بیتگ أنت۔ آواں ھم بے حسابا بلوچ دستگیر، بندیگ و لٹ کٹ کت أنت۔ ھمیشانءِ نیاما بازیں کس إش درتک أنت۔ پدا ھم گشگ روا إنت کہ واکدارانءِ کتگیں کارکردانءِ تاوان إیوکاں بلوچاں دیست أنت، بلے پاسدارانءِ کشگا بازیں غیر بلوچ ھم گلا بال کت أنت۔

عبدالمالک ریگی أنگت نوری زادہ و صدایء أمریکاءِ زینت أت۔ ھمے نند نیادانءِ برکتا ریگی منـّينگ بوت کہ وتی ٹولیءِ ناما شہ جندا۔۔۔ بدل بہ کنت و 'جنبشءِ مقاومت مردمی إیران' بزاں 'إیرانءِ مردمانءِ مزاحمتی جنز' إیر بہ کنت۔ إے کارا چؤ منیں ھم شاد بیت أنت کہ شاید ھمے برکتا مذھبءِ بیمناکیں پوشاک شہ ریگیءِ گورا لکؤشگ بہ بیت۔


ھمے جَھکا بوست دیما روان إتنت کہ شہ چاہ بھارءِ نزیکا بازیں درامد لھتے شہ جندا۔۔۔ یاگییے باسکاں چکانپت أنت۔ إے مردماں چکانپگا رند گجرانءِ گوش مِکّ بیت أنت۔ آواں مار إت کہ جاور ھما وڑا کہ ودی أنت؛ سادہ نہ أنت۔ بلے عبدالمالک ریگیءِ بازیں وشگپیاں گجرانءِ دل تشے خرسند کت أنت۔ نین گجران نند و چارگی أت کہ بارین ریگیءِ دیمتری گام کجا نیمگا چست إبیت!


إیرانی واکاں روچے 3، دگرےءَ 6، پدا 12 و 13 بلوچ مچّ کناں و درنجاں کت۔ سرکاری واکدارانءِ مقصد جندا۔۔۔ کشتگیں غیر بلوچانءِ حسابا برابر کنگ یا باج برگ أت۔ ھمے نیاما زابلءِ نزیکا یک سنی مدرسوے ھم إیران واکان وتی بلڈوزرانءِ دپا دات۔ إیشیءِ سببا شہ کش گوَری ھند و ملکاں آتکگیں بازیں طالب بے مدرسہ بیت أنت و آواں وانینوکیں پاکستانی ملا بے روزگار بیت أنت۔


ھمے مدرسوا پرؤشگءِ کارکرد پہ بازیناں دردناک أت؛ خاص شیعواں کافر منـّوکیں سنـّیاں وھدے قرآنءِ تاک ماں خاکانءِ چیرا بار گرگا دیست أنت، گڈا جؤش گپت أنت۔ پہ إیشیءِ بیڑا گرگا عبدالمالک ریگیءَ وتی کسانسالیں برات گاڑییے شہ شوروا پر کت دات تانکہ بہ رئوت و پاسدارانءِ سراوانی نبجاها بہ تراکینیت۔ کسانسالیں عبدالغفورءَ ھنچؤش کت۔


عبدالغفور ریگیءِ جانفدا بیڑ بلوچستانءِ تھا تاریخءِ أولی جانفدا بیڑ أت۔ بلــّی تؤریں عبدالغفورءِ آریپیں پت شنگ کتگیں ویڈیو و عکساں ودی إنت کہ وتی چُکـّا شہ جانفدا بیڑا پیسر رکصت کنگا إنت، بلے وتی جگرءِ کپـّا آسءِ تھا تھلانک دیگ إنسانءِ اوپارا در إنت۔ پمیشا دیر نہ کوَست کہ غمانءِ آسا آ بریان بیت۔


شہ چاہ بھار چکـّانپگ بیتگیں غیر بلوچ پاکستانی واکاں رسگا پچگپت و سلامتیا إیرانءِ دستا دات أنت۔ إیشیءِ برکتا سرکاری و سرکار مخالف گجرانءِ دل إیمن بیت أنت۔ عبدالغفورءِ جانفدا بیڑ ھم پہ بازیں گجراں اوپارا أرز إت۔ ألبت، أمیرالمومنین شیعہ مسیتءِ سرا جانفدا بیڑ سبب جؤڑ بوت کہ ریگی و سلطنتی شہ یکـّا دگر دلرنج بہ بنت۔

بلــّی توریں أنگت بازیں مغربی ملکانءِ چیردستیں گجر میڈیا واھوک إنت کہ جندا۔۔۔ءِ کتگیں کارکردانءِ حالاں تالان کنوکیں أولی حالجاہ بہ بنت و ھر بیڑا پد شہ عبدالمالک ریگی 'توضیح طلب' بہ بنت، بلے گندوکیں چم و إشکنوکیں گوش سرپد أنت کہ گجر شہ ریگی نین دلرنج بیتگ أنت۔ ھمیشیءِ مزنتریں درور شہ رضا پھلویءِ نیمگا پیرا پیر بیان دیگ إنت۔ ھمے بیانا آئیا پیشنءِ جانفدا بیڑ إیرجتگ۔

راستے ما پھک إشکنگائیں کہ پہ ریگیءِ کمکا أمریکا، برطانیا و دگرانءِ نام گرگ بیگا أنت، بلے سرپدیں مردم زان أنت کہ شہ إیشاں یکـّے ھم یک کرانے عبدالمالک ریگیءَ نہ دات۔ عبدالمالک ریگیءَ أگر شیعہ دشمنیں ملا کمک کنگا به بنت، دگہ خبرے۔


چشیں وھدےءَ کہ ریگی إیوکا رنبینگ بیتگ، آ مجبور إنت کہ وتا جاھے بہ ڈکـّینیت۔ نوکیں جاھا گچین کنگءِ آسراتی ریگیءَ نیست إنت۔ پرچاکہ آئی شہ بُرزیں جاھےءَ لیٹگراں بیگءِ وڑا إنت۔ چشیں وھداں مردم گچین کت نہ کنت کہ کجا یکـّیں ڈوک، تلار، بنڈا یا شیرّا پہ وتی جلــّینگا دست بہ جنت؛ آئیا ھرچے کہ دستا کپت، دست ئی جنت۔


ھنـّوگیں حالتا أگر ریگی بہ کپیت، ملا و گجر ھر دوئیں ٹولی سیت کن أنت۔ نقصانا بلوچ راجپھازی جھد گندیت۔ بازیں کسانءِ خیالا ريگیءِ جُھدا یک نیمگےءَ بلوچستانءِ نام توار دنیاءِ دیما سرکتگ، بلے دومی نیمگا بلوچءِ ھستیں راجپھازی جنزءِ دیما مزنیں تلار اوشتارینتگ۔ ھنوگیں جاوراں ھستیں راجپھازیں گلاں إے تلارانءِ پرؤشگا سال گوَز أنت۔


ألبت، أگر ریگیءِ جند بہ لوٹیت، رسگا دیر إبنت۔ پمیشا نیک نیتیں بلوچانءِ واھگ إنت کہ عبدالمالک ریگی وتی سیاستا گوں مشرقی بلوچستانءِ سلاحبندیں راجپھازی جھدا ھمدپ بہ دات۔ منی وڑینان وا ھمے شئور داتگ أت کہ سلاحبندیں جھدا چٹا یلہ بہ دات، بلے من سرپداں کہ آ ھنچؤشیں جاھےءَ سر بیتگ کہ اودا سلاحان دئور دیگ وتکشی إبیت۔

مردانی دیم کئ داشت کنت؟

مشرقی بلوچستانءَ إیرانی پاسدارانءِ دستمانجی إیرجنگ بوت


بلوچستانءِ راجی زرمبشءَ ماں وتی بیانےءَ مشرقی بلوچستانءِ تھا إیرانی واکانءِ دستمانجی إیر جت۔ زرمبش لوٹ کت کہ مشرق و مغربی بلوچستانءِ سیاسی گل ھؤریا ناروائیانءِ دیما بہ اوشت أنت

مشرقی بلوچستانءَ 27 أکتوبرءَ 11 إیرانی پاسدارانءِ دستگیر بیگا رند راجی زرمبشءِ إے بیان شنگ کنگ بوت۔ یازدھیں پاسدار سوچَگی تیل لڈتگیں یک گاڑییےءِ رندا کپان مشرقی بلوچستانءَ پترتہ بیتگ أنت کہ اودءِ واکاں دستگیر کتگ أنت۔

بیانءِ تھا پدّر کنگ بیتگ کہ إیرانی واک بے پرواھیا میاں اُستمانی قانون و راھبندان پرؤشگا أنت، و ھمساھگیں ملکانءِ سیماں سرگوَز کنگا أنت۔

بیانا گشگ بیتگ کہ شہ إیشی ساری 22 آگستءَ ماں ماشکیل إیرانءِ فوجا راکٹگواری کتہ بیتگ۔ شہ آ راکٹانءِ نیاما یکـّے ماں لوگےءِ سرا کپتگ أت کہ آئی سببا سئے بلوچ جنیں آدم شھید و لھتے ٹپـّی بیتگ إتنت۔ إیشانءِ کشا بازیں لوگ و ملکت راکٹاں پرؤشتگ إتنت۔

زرمبشءِ خیالا إیرانی رژیم گوں إے وڑیں کارکرداں بلوچاں ترسینگ لوٹیت۔

ترانگ بہ کپ إت کہ ھمے سالءِ أولی بھرا وھدے ماں مشرقی بلوچستان پہ وتی سرڈگارءِ آزادیا جھد کنوکیں سئے گچینی بلوچ، میر غلام محمد، میر شیر محمد و لالا منیر بلوچ شھید کنگ بیتگ إتنت، گڈا پاکستانءِ تھی جاورانءِ وزیر رحمان ملکءَ ماں وتی حالتاکی بیانےءَ إیرانءِ دستءِ ھؤر بیگءِ نیمگا إشارہ کتگ أت۔ آئیا گشتگ أت کہ إے لیڈرانءِ کشگا إیران ھم واھؤک بیتگ۔

بلوچ سیاسی جھدکارانءِ گرگ، جنگ، بندگ و بیگواہ کنگا پاکستان و إیرانءِ ھؤرکاریءِ تاریخ دراجکشینے إنت۔ 1970ءِ دھرا ھم پہ مشرقی بلوچستانءِ راجپھازی جنزءِ پرؤش دیگا إیرانی کوبرا ھلی کاپٹر و دگہ ضروری جنگی آسراتی کارمرز بیتگ إتنت۔

بلوچستانءِ راجی زرمبشءَ وتی بیانا سرکچ داتگ کہ پاکستان بہ بیت، عراق، لبنان، سعودی عرب، یمن و یا دگہ خلیجی ملکے؛ إیرانی دستمانجی بے لگام ھرجاہ أنگت أنت۔ یک نیمگےءَ بگندئے إیران وتا أٹمی واکے جؤڑ کنگا تکانسر إنت و دومیا ھَئیا کِشیاں شہ سلاح پرکنان و پہ خرابکاریا دریں ملکاں دیم دیان إنت۔

زرمبشءَ زور پرداتگ کہ إیرانءِ نوکتریں کارکرد پدل چارگ و إیرجنگ بہ بیت۔ ألبت شہ پاکستانی سرکارا چدا گيئشتر اُمیدوار بیگ مفتینے إنت۔ پمیشا مشرقی بلوچستانءِ سیاسی تنظیم و راھدربر إے دستمانجنیءِ خلافا یکتوار بہ بنت۔ ألــمّا گوں یکـّا دگرءِ کمک و ھؤرکاریا بلوچ قوم وتی منزلءِ نیمگا زیتر روان إبیت۔