مشرقی بلوچستانءَ إیرانی پاسدارانءِ دستمانجی إیرجنگ بوت

بلوچستانءِ راجی زرمبشءَ ماں وتی بیانےءَ مشرقی بلوچستانءِ تھا إیرانی واکانءِ دستمانجی إیر جت۔ زرمبش لوٹ کت کہ مشرق و مغربی بلوچستانءِ سیاسی گل ھؤریا ناروائیانءِ دیما بہ اوشت أنت

مشرقی بلوچستانءَ 27 أکتوبرءَ 11 إیرانی پاسدارانءِ دستگیر بیگا رند راجی زرمبشءِ إے بیان شنگ کنگ بوت۔ یازدھیں پاسدار سوچَگی تیل لڈتگیں یک گاڑییےءِ رندا کپان مشرقی بلوچستانءَ پترتہ بیتگ أنت کہ اودءِ واکاں دستگیر کتگ أنت۔

بیانءِ تھا پدّر کنگ بیتگ کہ إیرانی واک بے پرواھیا میاں اُستمانی قانون و راھبندان پرؤشگا أنت، و ھمساھگیں ملکانءِ سیماں سرگوَز کنگا أنت۔

بیانا گشگ بیتگ کہ شہ إیشی ساری 22 آگستءَ ماں ماشکیل إیرانءِ فوجا راکٹگواری کتہ بیتگ۔ شہ آ راکٹانءِ نیاما یکـّے ماں لوگےءِ سرا کپتگ أت کہ آئی سببا سئے بلوچ جنیں آدم شھید و لھتے ٹپـّی بیتگ إتنت۔ إیشانءِ کشا بازیں لوگ و ملکت راکٹاں پرؤشتگ إتنت۔

زرمبشءِ خیالا إیرانی رژیم گوں إے وڑیں کارکرداں بلوچاں ترسینگ لوٹیت۔

ترانگ بہ کپ إت کہ ھمے سالءِ أولی بھرا وھدے ماں مشرقی بلوچستان پہ وتی سرڈگارءِ آزادیا جھد کنوکیں سئے گچینی بلوچ، میر غلام محمد، میر شیر محمد و لالا منیر بلوچ شھید کنگ بیتگ إتنت، گڈا پاکستانءِ تھی جاورانءِ وزیر رحمان ملکءَ ماں وتی حالتاکی بیانےءَ إیرانءِ دستءِ ھؤر بیگءِ نیمگا إشارہ کتگ أت۔ آئیا گشتگ أت کہ إے لیڈرانءِ کشگا إیران ھم واھؤک بیتگ۔

بلوچ سیاسی جھدکارانءِ گرگ، جنگ، بندگ و بیگواہ کنگا پاکستان و إیرانءِ ھؤرکاریءِ تاریخ دراجکشینے إنت۔ 1970ءِ دھرا ھم پہ مشرقی بلوچستانءِ راجپھازی جنزءِ پرؤش دیگا إیرانی کوبرا ھلی کاپٹر و دگہ ضروری جنگی آسراتی کارمرز بیتگ إتنت۔

بلوچستانءِ راجی زرمبشءَ وتی بیانا سرکچ داتگ کہ پاکستان بہ بیت، عراق، لبنان، سعودی عرب، یمن و یا دگہ خلیجی ملکے؛ إیرانی دستمانجی بے لگام ھرجاہ أنگت أنت۔ یک نیمگےءَ بگندئے إیران وتا أٹمی واکے جؤڑ کنگا تکانسر إنت و دومیا ھَئیا کِشیاں شہ سلاح پرکنان و پہ خرابکاریا دریں ملکاں دیم دیان إنت۔

زرمبشءَ زور پرداتگ کہ إیرانءِ نوکتریں کارکرد پدل چارگ و إیرجنگ بہ بیت۔ ألبت شہ پاکستانی سرکارا چدا گيئشتر اُمیدوار بیگ مفتینے إنت۔ پمیشا مشرقی بلوچستانءِ سیاسی تنظیم و راھدربر إے دستمانجنیءِ خلافا یکتوار بہ بنت۔ ألــمّا گوں یکـّا دگرءِ کمک و ھؤرکاریا بلوچ قوم وتی منزلءِ نیمگا زیتر روان إبیت۔