Tuesday 22 September 2009

پاکستانیاں میر براھمدغ بگٹی ملکءِ بیمناکتریں ٹرورسٹ ظاھر کت


پاکستانی واکاں 83 مردمانءِ نام شنگ کت کہ 'ٹرورسٹ دستگٹیاں' ھؤر بیگءِ سببا اودءِ واکدار آواں لوٹوک أنت۔ إے مردمانءِ لڑا شہ پھکاں خطرناکتریں مردم بلوچ راھدربر میر براھمدغ بگٹی إنت کہ آئیءِ خلافا 31 'إف آئی آر' یا 'کئس' ثبت أنت۔


83ئیں ٹرورسٹانءِ نیاما 41 کس پنجابءِ نندوک، 21 سندءِ نندوک، 13 بلوچستانءِ نندوک و ٹرورسٹ أڈ کنوکیں دنیاءِ مزنتریں دمگ، بزاں سرحد پرگِنگا إیوکا 8 ٹرورسٹ ھنچوشیں ظاھر کنگ بیتگ أنت۔


ترانگ بہ کپ إت کہ گوَستگیں ھفتگا پاکستانءِ تھی جاورانءِ وزیر رحمان ملکءَ گشتگ أت کہ آ گوں میر براھمدغ گپ کنگءِ مقصدا أفغانستانءَ روگا ساڑی إنت۔ إیشیءِ سببا لھتے بلوچاں إشتاپ کت و میر براھمدغ بگٹیءِ نیتءِ سرا شک پیدا کنگءِ جھد بیت۔

Saturday 19 September 2009

عید مبارک


بلوچ دیھ پھکہ بلوچان وہ مسلمانان عید مبارک گوشیت۔
آزات بلوچستان زندگھ باتھ۔
شہ سرباز بلوچ

برفین کوه


برفین کوه


ھما بلوچ کہ ماں شمالی اروپا ءَ زندگی کننت گڑا زاننت برفین کوهءِ مطلب چی انت. ای ترمی لوژی ماں مختلفین پڑاں چوش کہ اقتصاد بزان اکونومی ، سیاست واستاتیک بزان آمار ءَ کار مرز بیت. اے ترمی لوژی مطلب اشنت کہ مردم برفین کوهءِ تیوکا سرظاھریں بھرءَ گندیت ، بلے ایی مسترین بهر بزان هشتاد در صدءَ نگندیت. بلے مطلب اے نہ انت کہ اے بهر نیست انت بلکین آپءِ چیرا انت


اسلام آباد وتهران مرچی چوش پولاتین "تایتانیک" ماں اتلانتیکءَ دیم په برفین کوه کہ اے دیما مک انت رواننت بے اش کہ کمین ترسے ببیت اش کہ اے برفین کوهءَ ٹکر وارت و ریسکی است که بہ پرشیت وچپیگ ببیت. پرچیا کہ آ چو تایتانیک ءِ معماران و دکترینان فکر کننت کہ چون اے ٹکرے برف اے پولاتین تایتانیکءَ پروشت کت کنت، بلے بے سما انت کہ آ یک عظیمین کوهےانت و ایوکا آییءِ سرانت کہ ظاهر انت. هر کسءَ کہ تایتانیک دیستگ گڑا زانت کہ چون پولاتین تایتانیکءَ گوں برفین کوهءَ ٹکر وارت و دو نیما بیت. وهدے تایتانیکءَ ظاهرا گوں کسانین برفین کوهءَ ٹکر وارت و دو نیما بیت گڑا آیان سما بیت کے پولاتین تایتانیک کمزورانت


مروچی اسلام آباد و تهران بلوچ سرزمین وتیگی کتگ و بلوچءِ مسئلهءَ چو ھما برفین کوهءَ گندگ ءَانت و گون وتی پولات جوڑ بیتگیں تایتانیکءَ دیم به آیی رواننت و چوش زانگ بیت که آیان پورھین و پکائین اراده کتگ که گون آ‏ئیا ٹکر بہ ورنت و آئیا په همیشه گار و گمسار بکننت. بلے زانگ بیت کہ آ زیت شموشکار بیتگنت و تاریخ دگہ چیزے گشیت


عزت مندین وانوکان بیا هوریگا اے دمگءِ راج دفترءِ نزیک ترین حادثه هان چارین ۔


وهدے پاکستان جوڑ بیت و بنگالیان وتی حقءِ رند گیری کت گڑا پاکستانءِ فوج چو پولاتین تایتانیک مان اتلانتیک دیم به بنگالءَ- که چو برفین کوهءَ تیوکا آیی سر ظاهرات - روان بیت و په همے مقصدءَ کہ گوں آئیا ٹکر بہ وارت و په همیشه آئیا چہ میدانءَ در بکنت. اے پڑا پاکستانءِ فوجءَ، بنگالی استیودنتانی سرا- کہ په وتی ماتی زبانءَ وانگ و نبیسگءِ حقءَ مچ بیتگ اتنت - تیر گواری کت و بازین چہ بنگالی استودینتاں شهید بیت انت و آ وھدی پاکستانی فوجیانی کرد گون بنگالیاں هما وڑا ات کے هیتلرءِ اس اس ار افیسران گون یهودیان کتگ ات، بلّی کہ بنگالی آ وهدا ھم پاکستانی باشنده و ھم مسلمان اتنت. بلے انگت پاکستانی پولاتین تایتانیک دیم په آ برفین کوهءَ برگ بیت واے پڑا لکهانی بنگالی شهید کنگ بیتنت و لکهانی جنینءِ ناموس ءِ سرا بیڑ برگ بیت. بلے انگت ھم پاکستانءِ پولاتین تایتانیک دیم به آ برفین کوهءَ روان ات. وهدے که پاکستانءِ پولاتین تایتانیک برفین کوهءَ نزیک بیت وگوں آئیءَ ٹکر دات گڑا سما اش بیت که صرف برفین کوهءِ سربیتگ که ایان دیستگت ۔ بلے نوں حبر چه هلوتءَ گوستگت و پاکستان پولاتین تایتانیک دو نیمءَ بیت و بنگلادیش یک وتواجهین راجے جوڑ بیت


هنوں ما گندگائیں که اسلام آباد و تهرانءِ پولاتین تایتانیک مان اتلانتیک دیم په ھما برفین کوهءَ که بزان بلوچ قوم انت روان انت و مقصد هم هما انت که بلوچ قومءَ چہ وتی بنداتی حق و حقوقان زبهر بکننت. مرچی ما گندگائیں که چون اسلام آباد و تهرانءِ واکدار بلوچانی بر حقین لوٹان غیر انسانی وڑا پسّو دینت ۔


برے سراوان انت، برے زاهدان انت, برے واش انت کے تهرانءِ رسترین فوجی بزان مرصاد ، بلوچانی لوگان مان بنت و گون هزار بے حرمت و بے احترامیا بلوچ وانندهان دست گیر و وتی سیاہ و تھارین بندیجاهان برنت. یا اسلام ابادءِ چاریگین اس آی اس انت کہ مان بلوچستانءِ کنڈ کنڈءَ چو ھونوار و ھڑکھی رسترءَ بلوچ حق لوٹیں جھدکارانی سرا بیڑ برانت و یا آھاں گرانت و بے گواه کننت. هنوں هزارانی بلوچ بے گواہ انت و کس نزانت کہ زندگ انت یا نہ ۔.


تمپءِ دردناکیں سانحہ شرّیءَ شون داریت کہ اسلام آبادءِ رودینتگین فوجءِ دلءَ چینچو نفرت بلوچانی خلافءَ ھست. آیانی قبضہ گیریں سیاستءِ سیتءَ نہ انت کہ بگدنت بلوچءِ چک، مزن و کسان پر ا منین وڑا مچ بیتگ انت تا کہ وتی شهیدانی یاتا زندگ بدارنت ۔پمیشا آیان ھمے پر امنین مچی سگّ ات کت نکت و مچیءِ سرا بیڑ برت ونوگلین مختار شهید و دهانی نفر دگہ ٹپیگ کتنت. تمپ اسلام اباد یا راولپنڈی نہ انت که اودان زندگیءِ سهولت موجود ببنت. ٹپیگین بلوچ په دوا و درمانءَ باید صدانی مایل دورتر برگ ببنت و نزیکترین منزل کراچی انت۔


راست انت کہ تمپ بے حد پشتءَ دارگ بیتگ بلے آئیا وتی پچار شرّیء َبرجاہ داشتگ۔ یک نمیگےءَ شاهی کلات و دگے نیمگےءَ شاهگانین نهنگ انت بلوچان سکین دنت که چہ آیان بی خیال مبنت.


اے ھم مند انت کہ شیر زالین ماتءَ شیر گلڑین بچ چوش کہ دکتر خالد کمبرءِ دروشمءَ رودینتگ، بانلیءِ درور انت؛ بر مهءِ اپوزوسیون لیدر سان سوچیءِ درور کریمه بلوچ رودینتگ. اے مند انت منڈیلائین غلام محمد رودینتگ . بلے همے مند چہ دنیاءِ درستین سهولتاں محروم انت ، ادان نه کتاب جاه است, نه نلی آپ است و نه گیس. بلے اے بلوچءِ گیس انت کے پنجاپءِ کنڈ کنڈءَ رسینگ بیتگ . بلے انگت ھم اے مند انت که بی مثالین جنک و بچ رودینیت و آیانا سبک دنت که اے ماتین وطن انت و پہ آییءِ حق ءَ ادا کنگءَ وتی جھدءَ سست مکننت ۔


ای کوهین برفءِ زیر آپین بهر انت کہ چوشین بچ و جنک پرورش دنت. اے کوهین برفے زیر اپین بهر انت که بلوچستانءِ گاندی بزان یعقوب مهرنهاد ای پرورش داتگ. اے یعقوب ات کہ گون وتی گاندی وڑیں سگّ و اوپارءَ شیعه ملاهانی رد وبندین قانونءِ تھا بلوچ قومءِ پجار ءِ گپّی جت. آییءِ مهر ات که اولیگین رندا بلوچستانءِ بنجاهی شهر بزان دزاپءَ بلوچی زیملی دیوانے برجم کت کہ بلوچ لجند واجه حاجی کمال هان بهر زرتگ ات. اے مهر ات کہ بلوچ ورناهی وتی انجمنءِ ساھگءَ مچ کتگ ا تنت. راست انت کہ اے تاسپیں جھدکار و دگہ هزاران بلوچ تنے وهدی اسلام آباد و تهرانءِ پولاتین تایتانیکءِ زدءَ آتکگنت و تایتانیک دیم به برفین کوها روان انت ۔.


اے اولیگین رند انت چہ مندءَ بگر تا کہ کوھلو، ڈیره بگٹی، پنجگور، کلات، خضدار، خاران، حب، تمپ ، تربت، مستونگ و کویٹه ءَ کہ آ برفءِ زیر آپین بهر گون وڑوڑین طریقهاں وتی همراهیءَ شون دیگ ءَ ا نت. دگہ نیمگےءَ ما یک پختگین سلاح بندین جهدےءَ شاهدیں ۔.


اے اولیگین رند انت کہ بلوچ قومءَ 50% چہ وتی ترادیشنلین ماحولءَ قدم ڈنءَ ایر کتگ و هنوں یک بے مٹین سیاسی کردے پیش کنگ ءَانت ۔


اے اولیگین رند انت کہ شهید غلام محمد ڈن چہ وتی لوگءَ، ڈن چہ وتی میتگءَ، ڈن چہ وتی دمگءَ، یک قومی لیڈرےءِ حیثیتءَ زانگ بیتگ بلکین سجهین بلوچستانءَ منگ بیتگ ۔.


تایتانیک دکترینان هر وڑین خطرانی پیش گویی کتگ و آ پیش گوئیانی مطابقءَ ھر نمونہ این رکاوٹ چہ آییءِ دیما دیر بیتگ و چے بین برگ بیتگ انت تا که آ دلجمیءَ وتی مقصدءَ سر ببیت . بلے دگے نیمگےءَ آ برفین کوهءِ دوئین بهران هم دست کٹءَ نکتگ بلکین فکر و طریقه چارتگ کہ تایتانیک معماران وتی مقصدءَ سر مبنت


بلے چوش کہ آییءِ گیشترین بهر آپءِ چیرا انت ، پمیشا تایتانیکءِ معمارانی چم آ مستریں بھرءَ میم نکننت و نمارنت.بلے تایتانیک چہ پولاتءَ جوڑ بیتگ و ماں سبزین ساوڑءَ اژناگ کنگ ءَانت و چہ آ برفین کوهءِ چیرین بهرءَ بے سما انت و همے فکر کنت کہ گون اولیگین ٹکرءَ آئیا چنڈ چنڈ کنت و هچ چمے آییءِ چونڈاں نہ گندیت. بلے راج دفتر چوش نگوشیت. ما گندیں دنیاءِ هچ امپراتوریءَ په زور غلام کتگین قومےءَ په همیشه وتی کالونی جوڑ کت نکتگ و آ قومان یک روچے غلامیءِ طوق و لوپ چہ وتی گردنءَ در کتگ، لهتے جاهءَ زیتر و لهتے جاهءَ دیرتر۔.


بلے خطرے کہ خاص آ برفین کوهءِ چیر آپین بهرءَ نزور و پروشیت آ تیوکا گوں پولاتین تایتانیکءَ بیت کت نکنت بلکین آییءِ وتی چیر آپین جنجال انت. چوش که بگوشین دنیاءِ آپ و هواءِ گرم بیگ. وهدے گرمین اپ برفین کوهءِ چیر آپین بهرءَ سر بیت گڑا آ باز طاقت نیاریت و آییءِ آپ بیگ بنگیج بیت انت و اگاں ماں چشیں وھد و ماحولےءِ تہا پولاتین تایتانیک وتءَ په برفین کوهءَ سر بکنت و آئیا ٹکر بدنت گڑا المءَ برفیں کوہءَ پروشیت ۔.


انچوش کہ ما برزا دیست کہ برفین کوهءِ خاص زیر آپین بهر هما وهدی گیشتر ناتوان ، کمزور و سست بیت کہ آ وتارا گو ں دنیاءِ بدلی و سدلیان همرد کت مکنت و دنیاءِ مختلفین اکتوران همے تاثرءَ دات مکنت کہ آ یک معتبرین اکتورے و زیر دئے کت کنت. آ وتی و دگرانی مفاد و سیتانی پاسپا نیا کت کنت ۔.


بیائین هوریگا بچارین و کوشست کنین و یک کسانین چم شانکے بلوچءِ برفین کوهءِ دوئین بهرانی سرا بدئین تاکہ بگندین و بچارین کہ آ تهران و اسلام آبادءِ پولاتین تایتانیکءِ ٹکرءَ پُجّیت


بیائین هوریگا بچارین کہ اے سلاح بندین جهد یک لوٹے کہ بلوچ بل اجبار، چہ وتی مجبوریءَ، بے وسیءَ، په وتی عزت، ننگ، ناموس،انسانی کرامت وپہ وتوا جہیءَ بنگیج کتگ ۔.


اے بلوچ ءِ لوٹ نہ انت کے کلانشیکوف دستءَ بگریت بلکین انچو کہ برزا گوشگ بیت آئیا په مجبوریا کلانشیکوف دستا گپتگ تاکہ اسلام اباد و تهرانءِ پولاتین تایتانیکءَ په مقصدا سر بیگا میلنت۔


بلے اگاں چوش انت، انچوش که برزا ذکر کنگ بیت دنیا همیشه مان بدلیانی تها انت و ماں اے بدلیان مختلفین اکتور کاینت و رونت. دنیاءَ نوکین نوکین اتحادی جوڑ بنت. زیگین دوست مرچیگین دژمن بنت و یا زیگین دژمن مرچیگین دوست بنت. بلے پرچیا زیگین دوست مرچیگین دژمن بنت. هر قومےءَ مفاد است،اے مفاد انت کہ زیگین دژمنءَ مرچیگین دوست کننت. گڑا مردم کدی اے کاران بکنت. اے کاران منی فکرا هما وهدا کنگ بنت کہ مردم چہ وتی سیت و مفادان سرپد ببیت. پرچیا کہ هرچ قومے وتی قومی مفاداں چہ آ دگہ سیت و کاراں دیماتر و عزیزتر زانت ۔


گونڈ بگوشان. سھرین رنگ، کلانشیکوف، لیلا خالد و چی گویرا ءِ هور کنگ و بلوچءِ جهدءَ گوں آھانی فکر و رھبندءَ بندوک کنگ آیا بلوچ قومءِ حقءَ انت؟ یا کہ آ تاریخءِ زیگین بهر انت و مرچی مارا نوکین اتحادی که مرچگین استرکچرءِ نمایندگیءَ کننت شوہاز کنگ لوٹیت ؟.


محمد زین الدینی - بی ان ام


Thursday 17 September 2009

آزادی‏ءِ جنزا بی إن پی مینگل هؤر نه إنت؛ بلوچ جنینانءِ مجلس

بلوچ جنیں آدمانءِ مجلس (بلوچ خواتین پئنل)ءِ گوانکوا گشت کہ بلوچستانءِ جنزا مینگل ٹولیءِ ھچ کارکردے نیست إنت۔ مینگل ٹولی و نشنل پارٹیءِ کار إسلام آبادی زنڈیں سرانءِ دیما آہ کشـّگ و پنڈگ لوٹگ إنت۔ بلوچ کـُشانءِ رکـّینگا نِندارینتگیں قاضیانءِ دیما مشرفءَ سزا دیگءِ بے بنیں لوٹا إے کنگا أنت۔
راستیں گپ إیش إنت کہ مشرفءَ أبید آصف زرداریءَ ھم سیاسی جھدکارانءِ لــُڑتکيں جَسد بلوچاں تحفہ داتگ أنت۔ 74ءَ بـُٹو بلوچانءِ کشوک أت و مرچی آصف زرداری ھما راھا گامگيج إنت۔
بادے مرچی ھزاراں بلوچ دشمن فوج و چاریگانءِ أذیتجاھاں وڑ وڑیں إیزا، لٹ کٹ و نگیگیانءِ دیمپان أنت۔ إیش پیئشدارگا أنت کہ شہ واکداراں إنصاف پنڈگءِ بدلا زوراکیانءِ دیما اوشتگءِ وهد إنت۔

ألبت زانگ ھژدری إنت کہ بلوچاں زندگا سوچک، کـُشگا پد تلپیں جاھاں دئور ديگ و جسدانءِ چکـّا 'پاکستان زندہ باد' نبیسگ ناکامیں 'ریاست'ءِ بیگواہ بیگءِ نشانی أنت۔
ماں توار شنگ بیتگیں بیانا بلوچ جنیں آدمانءِ مجلسءَ اُستمان سرکچ داتگ کہ ھزاراں بندیگیں بلوچ، صداں ھزار مردمانءِ درپدری و روچ در روچ جھدکارانءِ شھید بیگءِ درگتا شادِھی کنگ بلوچاں زیب نہ دات۔ پمیشا دستبندی بیتگ کہ آیوکیں عیدا سادگیا بہ گوازین أنت۔

Wednesday 16 September 2009

گلناز مریءِ شھادتءِ روچ دارگ بوت


گوستگیں رمضانءِ ماھا 'نیو کاھان' کوئٹہءَ پاکستانی فوجءِ تیرانءِ آماچ بیتگیں بلوچ شھید گلناز مریءِ شھادتءِ أولی سالروچ دارگ بوت۔ إے درگتا أنجمن إتحاد مریءِ جھدکاران گلناز مریءِ قبرءِ سرا بلوچستانءِ بیرق چیئرگپت و زالبولاں پل رتک۔ هوریا یادگیری دیوانا بازیں مردماں بھر زرت۔


گوں دیوانا تران کنوکاں بلوچستانءِ سرجمیں شھید ستا دات أنت۔ پدا گيئش إش کت کہ گلناز مریءِ شھادت پہ بلوچاں یک راھشونییے إنت۔ خاص پہ جنیں آدماں آئیءِ رتکگیں خوناں یک بےدروریں کِشکے کشتگ۔


توارءَ داتگیں حالتاکی بیانءِ ردا دیوان سرپد کنگ بیتگ کہ بلوچ جُنزا جنیں آدم مدام مردینانءِ کشا گون بیتگ أنت۔ ماں جنگانءِ پڑا مِڑوکیں مردیں آدماں توشگ و سلاح سر کنگا مدام ساڑی بیتگ أنت۔ ھنونیں جنگا ھم جنیں آدمانءِ کرد پہ ھر کسا ودی إنت۔


پہ شھیدانءِ شرّیں عاقبت، سرمچارانءِ سوبینی و بندیگانءِ مزنیں اوپارا دعا لوٹگا ساری گپ جنوکاں دیوان سرکچ دات کہ شھید گلناز مری بہ بیت، بانک شھناز رند یا زرینہ و دگہ درزناں جنیں آدم؛ پهک پاکستانی زوراکیانءِ آماچ بیتگ و یا ھست أنت۔


Tuesday 15 September 2009

بلوچستان زانتجاھا بندگءِ مقصد وانوکانءِ سالے زوال کنگ إنت


بلوچ رپبلکن إسٹوڈنٹس آرگنائزئشنءِ سرکشـّيا بلوچ وانوکاں ماں تربت ظاھری دات۔ ظاھری دیگءِ مقصد بلوچستان زانتجاھا بندگ کنگءِ سرکاری کارکردا إیرجنگ أت۔


پرئس کلبءِ دیما تنظیمءِ ھندی آرگنائزر بھرام بلوچ و دگہ درزناں وانوکاں پلاکارڈ داشتگ إتنت۔ پلاکارڈانءِ سرا سرکاری کاکردانءِ خلافا دانک نبشتہ إتنت۔


وانوکاں بلوچستان زانتجاھا بندگ کنگءِ مقصد بلوچ وانوکانءِ سالے زوال کنگءِ پندلے لیئک إت۔ آواں زانتجاھا پاچ کنگ و بندیگیں وانوکانءِ آزادی لوٹ إت۔

Sunday 13 September 2009

سراوانءَ مزاتی مچّانءِ برّگ بندات بوت


إیرانی حالجاہ 'فارس نیوز'ءِ ردا ماں سروان ربئی مچّانءِ برّگ بیگا رند نیں مزاتیانءِ برّگ بندات بیت۔ سراوانءِ شرتریں ناہ مزاتی و ربئی أنت۔ شہ إے مچّان 50 ھزار ٹن ناہ در کئیت۔

شہ بلوچستانءِ أواریں ھنداں دراتکگیں ناھا فارس تاجر أرزانیں نھادےءَ زیر أنت۔ ماں وتی کمپنیاں إیشیا بستہ بندی کنگا رند پہ بھا کنگا دریں ملکاں راہ دی أنت۔ اودا إیشی ھمسر زر بھا إبیت۔

Friday 11 September 2009

رستريں زابلی سپاهيگ ءُ بسيجی، بلوچ ءِ قاتل اَنت


گوستگيں روچانی دستگر بوتگيں بلوچانی سياد ءُ مردم وتی چماں ديستگ ءُ باز شاهد هست انت که چونکا رستریں زابلی سپاهيگ ءُ بسيجی ماں شستون ءُ ايرآپ ءَ بے جست ءُ پرس ءَ ماں مردمان ءِ لوگاں مان شاننت ءُ بيگناهیں بلوچاں دروگيں بهتام جننت، آهان ماں وتی لوگ ءُ جاهاں دوا دژمان ءُ لٹ کٹ ءُ بے عزت کننت، بلوچ ورنايانی چمان بندانت، آهانی پاکيں دستاں دست بند جننت ءُ گوں وت ءَ برنت.جــُـڈالیں خامنه ای ءُ نالائکيں احمدی نژاد ءِ بلوچ کشيں سياستانی بنيات ءَ زابلی رستراں گوں بلوچ کشيں شهرياری ءُ نورا ءِ سروکی ءُ ڈنی يں علی محمد آزاد ءُ گنوکيں سليمانی ءِ هم شوری ءَ وتی

چودھریءِ چُک یا سرحدی فوج، ھر دو بلوچءِ دشمن أنت؛ میر خیربیار


بلوچ راجپھاز میر خیربیار مری گشت کہ بلوچ سرڈگار و آئیءِ سرا و چیرا ھستیں سرجمیں مڈی بلوچءِ وتی أنت؛ پنجاب پنڈؤکے إنت۔ پمیشا پنڈؤکا حاکم منـّگ بلوچی دودمانا نیست إنت و بلوچانءِ ضروریتریں واھگ آزادی گرگ إنت۔

میر خیربیار مریءَ دیمترا درّائینت کہ بلوچءِ سرا تیر شہ چودھریءِ تفنگا بہ لگــّیت یا سیمسری فوجءِ؛ فرق نہ کنت۔ پرچاکہ ھردو بلوچ قومءِ دشمن أنت۔

روچتاک إنتخابءَ داتگیں بیانا دیمترا پدّر کنگ بیتگ کہ بلوچ قوما نہ لوٹتگ کہ گوادر، سوئی، کوھلو و بلوچستانءِ آدگہ ھنداں فوجی 'چاؤنی' بندگ بہ بنت۔ نے کہ إیشان چست کنگءِ جار بلوچءِ جیڑواں ٹھین أنت۔

میر مریءَ سرکچ داتگ "بلوچ قومءِ جھد پہ آزادی و وتی پشت گِيجَگا إنت۔ إے جھد وھدے کہ سوبینا سر بہ بیت، گڈا پہ دشمناں آوانءِ بستگیں سھولتانءِ رنبیگا أبید دگہ راھے پشت نہ کپیت۔ زوراکیں إنگریز وتی بستگیں و نیم بندگیں ماڑیانءِ رنبینگا مجبور بیت أنت، پنجابی وا ھچ نہ أنت"۔

بیانا دیمترا داتگ کہ بلوچ قوم وتی بھتءِ فیصلوا وت کت کنت۔ دنیاءِ آ دگہ قومانءِ وڑا بلوچاں واک، ھنر و سرپدی ھست إنت۔ ھر پڑا بلوچ لایق أنت۔ دشمناں پہ زور بلوچ سرڈگار دست گپتگ و وَتدِلا راضی أنت کہ بلوچ آوانءِ مدامی غلام إبنت۔ إیشی آوانءِ ناسرپدی إنت۔ پرچاکہ مرچی بلوچستانءِ ھر کنڈا شہ آزادیءِ واھگا سرریچیں بلوچ سر سِرَپتگ أنت۔

ماں وتی بیانا میر خیربیار مریءَ شہ بلوچ اُستمانا دستبندی کتگ کہ آ آزادی لوٹوکیں مردمانءِ ھؤرکار بہ بنت۔ میر خیربیارءِ خیالا آ بلوچ کہ پاکستانءِ سیاستا کنگا أنت، پہ نزانتی وتی قومءِ گــُٹــّا غلامیءِ مدامی طوقے بندگا أنت۔

Wednesday 9 September 2009

گوستگیں یکشنبہءَ ماں تمپ چے بیت؟

بلوچستانءِ ھند مندءِ نندوکین 22 سالی شھناز وتی زندگیا أولی رندا یک دیوانےءَ شت. ماں تمپ برجم دارگ بیتگیں إے دیوانا آئیءِ زند خطرانءِ دیمپان کت۔

گوَستگیں یکشنبہءَ دیوانءِ سرا پاکستانی فوجءِ تیرگواریءِ سببا ٹپـّی بیتگیں جنیں آدمانءِ نیاما شھناز رند ھم ھؤر إنت۔ فوجءِ دستا شھید بیتگیں نوجوان شاعر میرجان میرلءِ شھادتءِ سئمی روچءِ درگتا دیوان برجم بیتگ أت۔

شھنازءَ گـُشت کہ دیوانءِ تھا جنین، چک و مردیں نندوک و شعر گوشدارگا إتنت۔ فوجیاں دیوانجاہ أنگر کت۔ آواں دیوانا خلاص کنگءِ حکم نہ دات۔ نے کہ مردم درکپگا سکین دیگ بیت أنت۔ بس أناگتا لٹ و تیرانءِ دِرَد إش گوارینت۔



تیرانءِ لگگا شھنازءِ ناکو زھگ مختار بلوچ شھید بوت و پت عبدالرحمان لٹــّاں ٹپـّی کت۔

شهناز وت ماں 'زبیدہ جلال پرائمری أسکول' مندءَ اُستادے إنت۔ آئیا ماں گــُـٹــّا تیرے لگـّتگ۔ إیشیءِ سببا آئیءِ دستے خشک ترّتگ۔ گپ کنگا ھم درد ئی پــِر إنت۔

گوں بی بی سیءَ ماں وتی گپاں آئیا سرکچ دات "منی ناکو زھگ (مختار بلوچ)ءَ تیر لگّ إت و آ کپت، من آئیءِ نیمگا ھـِیز کـُت کہ منا ھم یکـّے لگّ إت۔

شھنازءِ پت عبدالرحمان رند بلوچءَ وتی بڈ ّءِ ٹپـّاں پیشداراں گشت کہ فوجیاں ھنچؤش بیڑ آرت کہ گشیئگا دشمنیں ملکےءَ سرا بَرَگ إبیت۔



عبدالرحمانءَ وتی زمینانءِ ٹکـّرے بھا کتگ و ماں کراچی چکّءِ علاجا کنگا إنت۔ آئیءِ رودینتگیں برات زھگے شھید بیت۔ پدا ھم گشت ئی کہ پہ ملکءِ خاطرا إے بیتگ أنت۔ پمیشا دل خـُرسند إنت۔


آئیا درّائینت کہ دیواناں بھر زیرگ ھر کسءِ جمھوری حق إنت۔ پمیشا چدا پد ھم أگر آئیءِ چکـّے ماں دیوانےءَ بھر زیرگا واھؤک بہ بیت، آئیا مھن نہ کنت۔






Source: www.balochinews.com

پاکستانی فوج بلوچاں جَنـَگا إنت و ملا أمریکاءِ مالاں سوچگا أنت

ھمے درگتا کہ پاکستانی فوجا بلوچستانءِ زانتجاھا بیڑ برت، اودا پہ مغربی ملکاں تیل و أزباب بروکیں ھشت ٹرک ماندارگ بیت أنت۔

بلوچستان زانتجاہ پاکستانی فوجا تانکہ إے ماہء گڈسرا بند کنائینتگ و بلوچ وانوکانءِ سرا میار ئی لڈتگ کہ آواں بازیں سلاح ماں ھاسٹلاں چیر داتگ أنت۔

شنگ بیتگیں حالانءِ ردا فوج و پولیسا دوشی بلوچستان زانتجاہءِ ھاسٹلءِ سئمی ماڑی پٹاستگ۔ ھمے نیاما شہ لھتے باناں دستی بمب، وتاس و دگہ سلاح دستا کپگءِ خبر شنگ کنائینتگ۔

وھدے کہ فوج و پولیس شہ وتی أصلی مقصد -ملکءِ سیت و مردمانءِ رکـّینگا شموشکار بیتگ أنت؛ شہ آوانءِ بے سمائیا أمریکا دشمنیں ملایاں سوب چست کت و کوئٹہءِ نزیکا ھشت ٹرک سوتک أنت۔

شنگ بیتگيں حالاں داتگ کہ ماں أفغانستان پہ أمریکا و آدگہ میانقومی فوجیاں سامان برگا راھییں ھشتیں ٹرکاں ماندارگا رند، موٹر سائکلاں سواریں ششیں سلاحبندیں مردم تتگ أنت۔ إے آسا ھچ مردما گــَرَز نہ بیتگ۔

چدا پیسر 31 آگستءَ ھم -ھما درگتا کہ بلوچستانءِ سیاسی جھدکار رسول بخش مینگلءَ ٹپـّيیں حالتا پاکستانءِ فوجی ماں بیلہءِ نزیکا پہ درنجگا برگا إتنت -پہ ناٹو واکاں أزباب بروکیں بازیں ٹرک ماں چمن سوچگ بیت أنت۔

Source: www.balochinews.com

Tuesday 8 September 2009

پہ بی گناھی بلوچانی گار کنگا زابلی زمہ وار انت


ھما بلوچ کہ ایرانی واکان چیری جاہا بندیگ کرتگنت، آوانی سیاد وہ وارسان زابلی زمہ وار گشتگنت، و گشتگت کہ اگر ایران بی گناھی بلوچ بندیگان یلو مکنت گرا ما ھم وتی بیرانی گرگا شر زانہ، و گشتت کہ بہتر انت ایران ای جیڑوا ھمدا حلاس بکنت وگرنا بلوچستانہ شھرانہ تھا یک بیگناھہ زابلیہ زندگ نمانیت
سرباز بلوچ

رستريں احمدی مقدم


رستريں احمدی مقدم پدا مئی گلزمين ءِ کپ ءُ چنڈ کنگ ءِ شومیں حال ءَ چه رستریں پاسدارانی فارس حالرسان ءَ شنگ کرت ءُ گشت که په بلوچستان ءِ ديوال ءَ ۳۰ ميليا رد تومان (۳۰۰۰۰۰۰۰۰۰۰ تومان) همے سال ءَ کارمرز بيت. اے رسترءَ گشت که تان هنون ۶۰۰ کيلومتر چه بلوچستان ءِ سيمسر بندگ بوتگ.

سرکار پیئشداریت کہ آ جیڑوانءِ گيشینگا پہ دل إنت؛ میر براھمدغ


دومی بهر ....


ھمشھری: تئی سرا میار لڈ ّگ بیگا إنت کہ تو شہ ھندوستان کمک زیرگائے؟


میر براھمدغ: ھندوستان، أمریکا، میانقومی تپاکی و یورپی تپاکیءِ ھؤریا؛ من شہ سرجمیں دنیاءَ دستبندی کناں کہ مارا کمک بہ کن أنت تاکہ ھمنچو زیت تر بہ بیت شہ پاکستانءَ وتا نجات دات بہ کنیں۔ أگر یک ملکے مارا کمک بہ دات؛ ما پہ زیرگا ھیئز کنیں۔ پرچاکہ ما زواکیءِ آماچیں و پہ وتی رکـّینگا جنگائیں۔ أمریکاءِ داتگیں سلاحان بلوچانءِ خلافا پاکستان کارمرز کت کنت، گڈا شہ دنیاءَ کمک لوٹگا بلوچ ھم میاریگ نہ بنت۔


ألبت تنے وھدی وا مارا ھچ درملکی کمک رسگا نہ إنت۔ پمیشا ما زوراکیءِ جنترا دروشگ بیگائیں۔


ھمشھری: ھنوگاں سروزیر 'یوسف رضا گیلانی' و سروزیر 'منموھن سنگ'ءِ نیاما ماں 'شرم ألشیخ' بیتگیں گدارءِ درگتا بلوچستانءِ تھا ھندوستانءِ دستمانجیءِ گپ دیما آرگ بیت۔ إیشیءِ باروا شما چے گش إت؟


میر براھمدغ: من وا ساریا پدّر کت کہ مارا ھچ ڈنی کمک نہ رسگا إنت۔ ألبت إدا ودی بیگا إنت کہ پاکستانءِ وتی ناسرپدیانءِ سببا دنیاءِ دیما بلوچ قومی جنز نامدارتر بیگا إنت۔


چدا پیسر شہ برطانیاءِ سرکارا لوٹ کنگ بیتگ أت کہ میر خیربیار مریءَ دستگیر بہ کنت و آئیءِ خلافا 'دھشتگری'ءِ کئس ثبت بہ کنت۔ آ کارکردءِ سیت ھم تچکا بلوچ قوم رس إتنت۔دنیاءِ مردم مئے جیڑہءِ باروا شہ پیسرا نیں گيئشتر سرپد أنت۔ مغربی رسانکاں مئے بزگیءِ سرا شہ پیسرا باز گيئشتر خبر شنگ بیگا أنت۔ إیش پہ ما یک نیکیں پالے إنت۔


ھمشھری: شما وتی سلاحبندیں جنگا چے وڑا سرکچ دات کن إت؟


میر براھمدغ: بہ چار؛ مئے 'گوریلا' جنگا دھشتگری جنگے حساب مہ کن إت۔ ما کٹریں مردم نهیں؛ ھنچیں سیاسی مردمیں کہ مئے سرا پہ زور جنگے لڈ ّگ بیتگ۔ سیاسی حقانءِ دستگرگءِ جھدءِ درگتا ما پہ وتی پھازگا جنگائیں۔ما منـّيں کہ 'ٹکنیک'ءِ حسابا شہ زوراکیں پاکستانی فوجا ما نزورتریں، بلے پدا ھم تنا وھدی کہ ما وتی آزادی پچ نہ گپتگ؛ جنگا برجاہ داریں۔


ھمشھری: خان آف قلات میر سلیمان داؤدءَ ھمے ھنوگاں 'آزاد بلوچستان کونسل' جؤڑ کت۔ إیشیءِ باروا شمئے خیال چے إنت؟


میر براھمدغ: گوں خان قلاتءَ منا تچکیں رابطہ نیست إنت۔ ألبت من پہ آزاد بلوچستانءَ بیوکیں ھر جھدءِ پلانگریا زیراں۔


ھمشھری: گشگ بیگا إنت کہ بلوچ رپبلکن آرمیءَ تو سروکی کنگائے؛ ھنیگاں ماں نصیرآباد دمگا 22 پولیس ھمے گلا چکانپت؛ کشت أنت۔ إے کارکردا شما چونکا روا منـّينت کن إت؟


میر براھمدغ: من بی آر إے یا بی إل إےءِ سروک وا نھاں، بلے آواں وتی برات منـّاں۔ گوں آوانءِ ھر کارکردا ھمسنتاں و آوانءِ پلانگریا زیراں۔


پولیسانءِ چکانپگ و پدا کشگءِ کار گوں یک سرکاری ناروائیا ألمـّا بندوک إبیت۔ شاید آ مزاحمتکار شہ ما گيئشتر زوراکیانءِ آماچ بیتگ أنت و یا شہ ما گيئشتر گوں قومی جُنزا بندوک أنت۔إدا إے خبر چارگی إنت کہ پولیس پرچا ھما جاگھا کہ شہ ھمودا کہ چکاپنگ بیتگ إتنت؛ شتگ أنت! آواں پہ آزادیا مِڑوکیں بلوچانءِ خلافا لانکارتہ بیتگ۔ سرجمیں بلوچ ساریا گشگ بیتگ أنت کہ پاکستانءِ خدمتگزاریا یلہ بہ دی أنت۔ پدا ھم چکانپوکاں بازیں جفا کش یلہ داتگ إتنت۔


ھمشھری: بزاں تو گچینی مردماں کشگءِ پلانگریا زیرئے؟


میر براھمدغ: من نہ گشگایاں کہ پلانگری إش زیراں۔ ألبت من دلجماں کہ بدییے بیتگ کہ آئی پسّوا إے کار إبنت۔ مں أبکـّواں کہ وھدے یک پنجابی حجام، گدشود و یا اُستادے کشگ إبیت، گڈا پاکستانءِ سرجمیں رسانک جاہ سرّ أنت۔ ألبت بلوچانءِ سرجمیں میتگ فوجءِ بمبگواریانءِ سببا تباہ بیگا أنت، بلے یک خبرے ھم بلوچءِ پلانگریا شنگ نہ بیت!زاناں بلوچ إنسان نہ أنت؟


ھمے بے میار زاناں فوجی 'ٹارگٹ کلنگ'ءِ آماچ نہ بیگا أنت؟وھدے مئے ھست و نیست برباد کنگ إبنت؛ مارا زرانک سُرینگءِ حق نیست إنت؟


(پہ ما أبید شہ مزاحمتا) دگہ چے راہ پشت کپتگ؟حیرانیءِ گپے إنت کہ فوجی زوراکیانءِ باروا مردم بے توار أنت و ھمے زوراکیانءِ پسّوا کارے بہ بیت، گڈا چیھال کن أنت!


ھمشھری: نیں تئی ناکو زھگ –میر عالی ماں ڈیرہ بگٹی سر بیتگ و بگٹی ٹکءِ نواب جؤڑ بیتگ، إے باروا باریں تئی ناوشی چے أنت؟


میر براھمدغ: مردم أگر تاریخءَ بہ چاریت، گڈا ودی إبیت کہ سرکارا ماں بلوچستان مدام بلوچ گوں یکـّا دگرا گٹگیر کنائینتگ أنت۔ میرعالیءَ نواب جؤڑ کنگءِ مقصد ھم ھمیش إنت۔


(هنـّیگیں) سرکارا أولسرا زبان دات کہ آ بلوچستانءِ سرا فوجی آپرئشنا کٹــّینیت و درپدر بیتگیں بگٹیاں پدا ماں ڈیرہ بگٹی بارت و نندارینیت۔ ألبت شہ بے واکداریءِ سببا سرکارا وتی إے قول پیلو کت نہ کت أنت۔ رندا میر عالی إش برت؛ ماں ڈیرہ بگٹی نندارینت۔ ألمـّا إے کارکرد بلوچستانءِ جیڑواں ٹھینت نہ کنت۔ پمیشا ودی بیت کہ میر عالیءَ ماں ڈیرہ بگٹی نندارینگءِ کارکردا ھچ سیتے نہ دات۔ فوج و مزاحمتکارانءِ نیاما جنگ أنگت برجاہ إنت۔ ھر روچ گئس پائپ تراکینگ بیگا أنت، فوجءِ سرا بیڑ برگ بیگا أنت و راکٹانءِ کپگ، و بمبگواری أنگت برجاہ أنت۔


سرکاری واک ھم ھَئیّا مردماں گرگ؛ بندگا أنت۔ میر عالی شہ ترسا ماں قلاتا بند إنت۔ آئی شہ وتی ٹکءِ مردماں هم ترسگا إنت، پمیشا آوانءِ ترّتابءِ سرا بندش ئی جتگ!


أگر راستیا ڈیرہ بگٹیءِ جاور میر عالیءِ دستا أنت و آئی خیالا دمگ إیمن إنت، گڈا پرچا آزاد رسانکءِ نمایندواں اودا روگءِ إجازتا نہ دات؟ رسانکءِ نمایندہ أگر وت بہ رو أنت؛ بہ چار أنت، گڈا منی خبر راست ثابت إبیت کہ آ 'نو گو إیریا' یے إنت!


ھمشھری: شمئے پیرک نواب گٹیءَ وتی زندگیءِ تھا یک ھوریں قومی گلے جؤڑ کنگءِ ضرورت درشان کـُت۔ نیں شما پارلمنانی سیاستءِ خلافا جنزےءَ راھدربری کنگا إت! باریں سبب چے أنت کہ نشنل پارٹی و مینگل ٹولی شمئے سیاستءِ پلانگریا نہ زیرگا أنت، و ھوریں گلے أڈ کنگءِ واھگ پیلو نہ بیت؟


میر براھمدغ: منی خیالا سلاحبندیں جھد و مزاحمتی جنز راجپھازی سیاستءِ أصلی درؤشم أنت۔ أگر مرچی ألکاپیں وڑےءَ بلوچانءِ پانکجنیا کسے کنگا بہ بیت، گڈا ھما ئی کنگا أنت کہ ماں کوھاں پہ بلوچستانءِ آزادیا جنگا أنت۔ گوں ما نشنل پارٹی یا مینگل ٹولیءِ هؤر نہ بیگا ھچ فرق نہ کنت۔


شھید أعظمءَ یک ھوریں قومی گلے أڈ کنگءِ واھگ ھست أت۔ مرچی 'بلوچ نشنل فرنٹ' ھست إنت۔ إیشیءِ جھدءِ مقصد بلوچستانءَ رکـّینگ و شہ پاکستانءَ آزاد کنگ إنت۔ من شہ بلوچ قوما دستبندی کناں کہ سلاحبندیں ٹولیانءِ پلانگریا بہ زیر أنت و مزاحمتی راھبندا بہ رو أنت۔ پرچاکہ إسلام آباد پہ بلوچانءِ پجّارءِ گار کنگا تـُـکشگا إنت۔


ھمشھری: باریں ھنوّگيں مزاحمتی جنزا مری و بگٹی ھؤریا بھر زیرگا أنت یا شہ یکـّا دگر گِستا أنت؟


میر براھمدغ: مری مئے برات أنت۔ مئے نزیکی گوں یکـّا دگر باز کوَھن أنت۔ مئے ھند گوں یکـّا دگرئیاں نزیک أنت۔ ما سرپدیں کہ مئے دشمن یکـّین إنت۔ پمیشا پہ مئے عاقبتءِ رکـّینگا مارا ھمگرنچ بیگ پکار إنت۔


ھؤریا إے گپا تچک کنگ ضروری إنت کہ مئے جُنزا إیوکا مری و بگٹی گون نہ أنت؛ إیشیا شہ بلوچستانءِ ھر دمگا مردم ھمراہ أنت۔ ھمے إمبری أپریل ماھا بلوچستان نشنل موومنٹءِ سروک میر غلام محمد بلوچ گوں وتی ھمسنت لالا منیر بلوچ و شیرمحمد بلوچ سیمسری فوجا چکانپت و شھید کت أنت۔ إیش بلوچستانءِ ھما ھندا نندوک إتنت کہ اودا ھچ سردار و یا نوابءِ راج نہ أت۔من ٹکـّی رواجءِ خلافا نھاں؛ ألبت لوٹاں بہ گشاں کہ کیچ دمگ ھم دیرہ بگٹی و کوھلوءِ وڑا گوں جنزا ھمراہ إنت۔ مرچی سرجمیں بلوچستان آزادیءِ لوٹا گوں ما ھمتوار إنت۔


Source: www.balochinews.com

Monday 7 September 2009

سرکار پیئشداریت کہ آ جیڑوانءِ گيشینگا پہ دل إنت؛ میر براھمدغ


پارلمنانی سیاستءِ مخالفیں سیاسی راھدربر و بلوچ رپبلکن پارٹیءِ سروک میر براھمدغ بگٹی شہ وتی پیرک (نواب إکبر شھباز بگٹی)ءِ شھادتا رند شہ چیریں جاھےءَ سلاحبندیں جُنزے راھدربری کنگا إنت۔ ھمے ھنـّیگاں 'ھمشھری'ءَ گوں آئی یک خاصیں گند نندے کتگ کہ پہ وانوکاں ندر إنت۔

ھمشھری: پاکستانی سرکار تئی سرا میار لڈیت کہ تو گوں ھندوستانءِ کمکا ماں أفغانستان نشتگئے و پہ بلوچستانءِ جدائیءِ جُنزا راھدربری کنگائے! تئی خیال نہ گشیت کہ پاکستانی سرکار وتی واهگءِ ردا کابلءَ زور پر دات و شہ اودا ترا درانڈیہ کـُت کنت؟

میر براھمدغ: ساریا باز رندا إے خبر شرّیا گیشینتگ کہ من ماں أفغانستان یا دگہ ملکےءَ نھاں۔ ھنوں ھم بلوچستانءَ وتی مردمانءِ نیامایاں۔ ألبت ناسرپدے نھاں کہ مردماں بہ گشاں من کجا چیراں تاکہ 'پنجابی فوج' گوں من ھما بہ کنت کہ گوں منی پیرک نواب أکبر شھباز بگٹیءَ کت ئی۔ نواب صاحب پہ گپ ترانا ھم ساڑی أت و آئیا گوں چودھری شجاعت حسین و مشاھد حسین لھتے گدار ھم کت أنت۔ إیشیءِ بَروَرد آئیا ھمے دیگ بیت کہ فوجی بیڑے شھید کنگ بیت و آئیءِ جسد ھم کٹما دیگ نہ بیت۔

أصلی گپ إیش إنت کہ شہ بلوچستانءِ جیڑواں مردمانءِ دلگوشاں دگہ نیمگےءَ ترّینگءِ مقصدا سرکار ماں أفغانستان منی چیرٹپـّگءِ خبراں سازگا إنت۔ آئی نہ لوٹیت کہ مردم شہ بلوچستانءِ آزادیءِ جُنزا سرپد بہ بنت۔

یک گپے تچگ بہ کناں کہ أگر ضرورت بہ بیت، گڈا من أفغانستان یا دگہ ملکےءَ رَوَگا چکّ پد نہ بیاں۔

إے راستیا زانگ ضروری إنت کہ دنیاءَ وتی سیاست مٹــّینتگ۔ پمیشا شہ دگہ ملکےءَ منا درانڈیہ کنگائینگ شہ پاکستانءِ ھَوبَتا در إنت۔ أگر أفغانستان و یا یورپءَ بہ رواں؛ من دلجماں کہ بلوچ جیڑہءِ باروا سرپدیں مردم منا پاکستانءِ دستا نہ دی أنت۔ پرچاکہ ھنـّی آ سرپد بیتگ أنت کہ بلوچانءِ سرا جنگ پاکستانی سرکارا پہ زور لڈ ّتگ۔ دروغبندیں پاکستانی سرکارءِ 'پروپگنڈا'ءَ دنیا حسابا نہ آرگا إنت و مئے خبرءِ پلانگریا زیرگا إنت۔

کلانیں راجپھاز سردار خیربخش مریءِ زھگ میر خیر بیار مری و گزین مریءِ چکـّا ھمے وڑیں بے بنیں میار ساریا لڈ ّگ بیتگ إتنت، بلے وھدے کہ آ ماں لندن و دبئی واکداریں دادجاھاں برگ بیت أنت، گڈا آوانءِ خلافا ھچ میار ثابت نہ بیت۔

پاکستانی فوجءِ جندا مارا شہ لوگاں در کت، کوھاں راہ دات و تفنگ چست کنگا مارا مجبور کت۔ مئے ھر میتگءِ سرا بمبگواری کت۔ میتگانءِ ھست و نیست برباد کت أنت۔ و مئے اُستمان إش درپدریں زند گوازینگا مجبور کت۔

ھمشھری: ملکءِ بنجاھی سرکارا سنئٹر رضا ربانیءِ سروکیا پہ بلوچستانءِ جیڑوانءِ ٹھینگا یک ٹولییے جؤڑ کت۔ إیشیا 15 شرط وزیر أعظم سید یوسف رضا گیلانیءِ دیما پیئش کتگ أنت کہ منـّگ ھم بیت أنت۔ باریں سرکارءِ إے گامگيجاں شما ستا دی إت و مزاکرتءِ بھرے بیگا شما ساڑی إت؟

میر براھمدغ: من سرپداں ھما ناروائی کہ مرچی بلوچ اُستمانءِ سرا بیگا أنت، آوانءِ دَروَر مشرفءِ دھرا ھم دستا نہ کپیت۔ پی پی پی سرکار پیسریانءِ رند پدا روگا إنت۔ أنگت بلوچستانءِ سرا فوجی 'آپریشن' برجاہ إنت۔ أبید شہ قاضیانءِ إجازتا ھر روچ سیاسی جھدکار دستگیر بیگا أنت۔ پٹاسکاری بنجاہ ھر روچ گيئشتر بیان أنت۔ أگر شمئے خیالا ما أنگت گوں سرکارا بہ نندیں و مزاکرات بہ کنیں، گڈا ألمـّا شما روائیں گپے نہ کنگا إت۔

مزنتریں گپ إیش إنت کہ ما آزادیءِ جنگا مڑگائیں، نہ کہ پرگِنگی وتواجھییئے۔ پمیشا دو دینکارانءِ نیاما ھما وھدی مزاکرات بیت کنت کہ آ پہ دے گرا راضی بی أنت۔ ما شہ پاکستانءَ ھچ نہ لوٹگائیں و نے کہ شہ وتیاں چیزے دیگا ساڑییں۔ ما گـُشگاییں کہ تئے پاکستان پہ زؤر مئے لوگا پـُترتگئے، مارا پہ زؤر گوں وت إت ھؤر ترّینتگ؛ پمیشا شہ مئے لوگا درکپ و بل کہ ما وتی آزادیءِ جارا جنیں!

شہ إیشیا إبید مارا گوں پاکستانءَ ھچ جیڑوے نیست إنت۔ رند شہ آزادیا ما وت شـَوربندیں کہ گوں پاکستانءَ چے وڑیں نزیکییے بہ کنیں۔

ھمشھری: بزاں شما مزاکراتءِ سرجمیں در بستگ أنت؟ چؤش بیت نہ کنت کہ شما سرکارا لھتے دردواریں سوج بہ دی إت تاکہ پہ مزاکراتءِ سوبینیا سرکارھما نیمگا گامگیج بہ بیت!

میر براھمدغ: ھنـّی ما جنگءِ پڑائیں۔ إے درگتا ما گوں سرکارا چٹـا مزاکرات نہ کنیں۔

همے ھنیگان 'ھیرالڈ'ءَ وتی گچینی حالےءَ سرپدی داتگ أت کہ پہ ھنچنائیں مردماں 'ڈیرہ بگٹی'ءَ رَوَگ أنگت مھن إنت۔

نیں سرکار باید ثابت بہ کنت کہ آ بلوچستانءِ جیڑواں ٹھینگا واھوک إنت۔ ألبت أگر پی پی پی بہ واھیت، پدا ھم آئیا إے إجازت نیست إنت کہ بلوچستان جیڑواں بہ ٹھینیت۔ پاکستانی فوج و نوکرشاھی بلوچستانءِ جیڑواں ٹھینگ نہ لوٹ أنت۔

أولسرا پنجابی فوج شہ بلوچستانءَ در بہ کپیت، دستگیریں سیاسی و ھنچنائیں مردم یلہ دیگ بہ بنت و فوجی بنجاہ جوڑ کنگءِ کار أنگار کنگ بہ بنت۔ ھمے داتگیں لوٹ کہ پیلو کنگ بیت أنت، رندا ما چاریں باریں گوں سرکارا خبر کنگ بہ بیت یا نہ، و گوں پاکستانءَ ھؤر زند گوازینت کنیں یا نہ!

شہ ھمے گپاں کمتر دگہ سرحالےءَ ما ھچبر گوں پاکستانءَ گپ نہ کنیں۔

ھمشھری: تئی سرا میار لڈ ّگ بیگا إنت کہ تو شہ ھندوستان کمک زیرگائے؟

پشت کپتگیں بھر دگہ برے۔

Source: www.balochinews.com

ماں تمپ جلسوا فوجی تیرانءِ آماچیں شھید مختار بلوچ

6 ستمبر 2009ءَ ماں تمپ شھید میرجان میرلءِ شھادتءِ سئمی روچءِ درگتا برجم دارگ بیتگیں دیوانءِ سرا پاکستانی فوجءِ حملوا شھید بیتگيں بلوچ ورنا مختار بلوچءِ جسد ماں مند؛ إنتراپ کوہءِ دامنا 7 ستمبر 2009ءَ کل کنگ بیت۔ داتگیں عکسا آئیءِ جسد دیم پہ گورستانا بَرگ بیگا إنت۔ ھمے عکسءِ راستی کنڈا گڈی دیدارءِ ندارگ إنت و چپّی کنڈا آئیءِ زندگیءِ نوکتریں عکسے إنت۔

Sunday 6 September 2009

تمپ: جلسہءِ سرا فوجءِ حملہ، بلوچے شھید 27 ٹپـّی بوت أنت


تمپ -بیورو رپورٹ: ماں تمپ شھید میرجان میرلءِ شھادتءِ سئمی روچءِ درگتا یک پَسیلےءِ تھا دیوانےءِ برجم دارگ بوت۔ دیوانءِ کماشی بانک کریمہ بلوچ کت و خاصیں مھمان بی إس او -آزادءِ بُنجاھی کمیٹیءِ باسک نصیر بلوچ، بیبگر بلوچ، بی إن إفءِ جھدکار نجیب بلوچ و آصف بلوچ إتنت۔ چارچینیءِ ذمواری پیرجان بلوچءَ زُرتگ أت۔


إے مچّیا مزنیں حسابےءَ جنیں و مردیں آدم آتکگ إتنت۔ گوں دیوانا بی إن إم مند ھنکینءِ بانک ماھرہ بلوچ، بی إن إم تربت ھنکینءِ بانک خیریہ بلوچ و بی إس او -آزاد تمپ ھنکینءِ بانک سامیہ بلوچ و عایشہ بلوچءَ تران کـُت۔ چدا پد بانک عندلیب بلوچ تران کنگا أت کہ پاکستانی فوجا دیوانءِ سرا حملہ کت۔


إے حملوا فوجا اَرس ریچی گئس دئور دات، تیر گواری کت و مردم لٹ کٹ ھم کت إنت۔ إیشانءِ سببا 72 کس ٹپـّی بوت أنت۔ شہ ٹپـّیاں مختار چکءِ عبدالعزیز کہ مند نندوکے أت بیران بیران بوت۔ آدگہ دو ٹپـّیانءِ نیاما إمداد چکءِ حیاتان و بانک شھناز چک عبدالرحمانءِ حالت نگيگ أنت۔ إیش پہ دوا درمانا تربت و شہ تربت دیم پہ کراچی برگ بیت أنت۔


آدگہ ٹپـّی جنت چکءِ یوسف، دربی بی چکءِ أحمد، عندالیب، عارف، إبراھیم، نوشیروان، شھیب، إعجاز چکءِ نواز، آصف بلوچ، واحد بلوچ، شیرجان بلوچ، پیرجان، خورشید، بیبگير، وھاب، خدابخش، مبارک علی، أسد دازنی، نبیل محمود، ولید بلوچ، منیر آدم، حسین، صدام بلوچ، زاھد، ظاھر فقیر و شش سالگیں عمران چک جان محمد أنت۔

بيگناهيں بلوچ ورنا دستگرءُ بندی بيگ انت


تپتان حالرسان: گوستگيں روچاں بازيں بلوچ ورنا چھ شستون ءُ ايرآپ ( دزاپ ـ زاهدان ) ءَ دستگر ءُ ماں حکومتی کورچاتاں دؤر ديگ بوتگنت. لهتيں چه اے بيگناهيں ورنايانی نام ايش اَنت: ۱ـ حمزه ریگی۲ـ سعید ناروئی۳ـ عبدالرحمان ریگی۴عزت الله ریگی۵ـ عبدالمالک ریگی۶ـ حبیب الله ریگی۷ـ ابراهیم ریگی۸ـ اسماعیل ریگی۹ـ حامد ریگی۱۰ـ احمد قنبرزهی۱۱ـ عبدالله ناروئی۱۲ـ اسدالله شه بخش۱۳ـ ناصر شه بخش